Aktual mövzular: Dollar alış-satışı, Məzənnə, Neftin qiyməti

Xalça satışının genişləndirilməsi Emal Mərkəzinin yaradılmasından və fəaliyyətinin təşkilindən asılıdır

Xalça satışının genişləndirilməsi Emal Mərkəzinin yaradılmasından və fəaliyyətinin təşkilindən asılıdır

Tarix: 16 Yanvar 2020 17:03

Bakı. Trend:

Prezident İlham Əliyevin diqqət və qayğısı ilə Azərbaycan xalçaçılığı özünün yeni inkişaf mərhələsinə qədəm qoyub. 2016-cı ildə yaradılan "Azərxalça" Açıq Səhmdar Cəmiyyətinin respublika ərazisində 21 filialı fəaliyyət göstərir.

Cəmiyyətdən Trend-ə verilən məlumata görə, filiallar yaradılarkən, ilk növbədə, daha çox tarixi ənənələrə malik xalçaçılıq məntəqələrinə, peşəkar toxucusu çox olan rayonlara üstünlük verilib.

Bunu kütləvi informasiya vasitələrinə açıqlamasında “Azərxalça” Açıq Səhmdar Cəmiyyətinin mətbuat katibi Tural Səfərov deyib.

O bildirib ki, 2019-cu il ərzində “Azərxalça” Açıq Səhmdar Cəmiyyətinin filiallarında 2 min 555 ədəd, 8 min 836 kvadratmetr xalça toxunub. Cəmiyyətin filialları arasında ən məhsuldarı Lənkəran şəhərindəki xalça istehsalı emalatxanasıdır. Belə ki, 2019-cu ildə Lənkəran filialında 900 kvadratmetr xalça istehsal olunub.

“Azərxalça”nın fəaliyyəti dövründə, ümumilikdə, 4 min 292 ədəd, 14 min 770 kvadratmetr xalça toxunub. Həmin xalçaların 4 min 559 kvadratmetri satışa hazırlanıb ki, onun da 1919 kvadratmetri, təqribən, 50 faizi satılıb. “Azərxalça”nın istehsalı olan məhsulların satışının intensivləşməsi Hazır Xalçaların Emalı Mərkəzinin yaradılmasından asılıdır. Hazır xalçanın emalı ilə bağlı insanlarda o qədər də təsəvvür yoxdur. Ancaq dünya bazarı bunu tələb edir. Xalça hanadan kəsildikdən sonra o, emal olunmalıdır. Yəni xalça yuyulmalı, dartılmalı, ütülənməli, beləliklə, satışa hazır vəziyyətə gətirilməlidir. Xalçanın təbii boyalarla boyanmış iplərdən toxunduğu, keyfiyyəti emaldan sonra üzə çıxır. Ona görə də dünya bazarında emaldan keçməmiş xalçanı almırlar. Xalça ticarəti ilə məşğul olan şirkətlərin əsas tələbi xalçanın emal edilməsidir. Bu mərkəz fəaliyyətə başladıqdan sonra istehsal etdiyimiz xalçaların satışa çıxarılması prosesi intensivləşəcək, bizim məhsullarımızın hamısı daxili və xarici bazarda satılacaqdır. Artıq Emal Mərkəzinin layihə-smeta sənədləri hazırlanıb. Yaxın gələcəkdə mərkəzin tikilməsi nəzərdə tutulub.

“Azərbaycan xalçası çox keyfiyyətlidir. Ona görə də bizim xalçaların satışı ilə bağlı heç bir problem yoxdur. Dünyada elə bir ölkə yoxdur ki, keyfiyyətli xalça istehsalında Azərbaycanla rəqabətə girə bilsin”,- deyən Tural Səfərov bildirib ki, sadəcə olaraq, istehsal etdiyimiz məhsulları dünya bazarının tələbləri səviyyəsinə gətirmək lazımdır. Məhdud imkanlarla satışa hazırlanan xalçaların təqribən 50 faizi satılıb. Satışa hazırlanan digər məhsulların da satışı qısa zaman ərzində həyata keçiriləcəkdir.

Qeyd olunub ki, xalça fabriklərində toxunan xalçalar artıq “Azərbaycan brendi” kimi dünyaya ixrac olunur. “Azərxalça” Açıq Səhmdar Cəmiyyəti istehsal etdiyi məhsulları beynəlxalq xalça bazarına çıxarmaq üçün mühüm tədbirlər həyata keçirir. “Azərxalça”nın müxtəlif ölkələrdə keçirilən beynəlxalq xalça satış-sərgilərində iştirak etməsi, Azərbaycan xalçalarının təbliğatı məqsədilə dünyanın nüfuzlu “Halı” və “Carpet XL” jurnalları ilə əməkdaşlığı öz bəhrələrini verir. Artıq ABŞ, Rusiya, Yaponiya, İsveç kimi ölkələrin bu sahə üzrə ixtisaslaşmış şirkətləri Azərbaycan xalçalarına ciddi maraq göstərirlər. Təkcə ötən il Yaponiyanın “Chiyoda Jyutan” və “Sathi Group” şirkətləri ilə danışıqlar aparılıb, Yaponiyaya xalça ixracı ilə bağlı razılığa gəlinib. Bundan başqa, “Azərxalça” ilə ABŞ-Azərbaycan Ticarət Palatası arasında Niyyət Protokolu imzalanıb.

Səhmdar Cəmiyyət ixrac potensialının artırılması istiqamətində görülən işləri uğurla davam etdirir.


Etiketlər:  Xalça satışının genişləndirilməsi Emal Mərkəzinin yaradılmasından fəaliyyətinin təşkilindən asılıdır


RƏYLƏR



Populyar Xəbərlər

XƏBƏR LENTİ