Azərbaycanlı ailənin qarışıq hekayəsi: ''Almaniyaya turist kimi getmişdilər, qaçqın düşərgəsinə düşdülər''

Tarix: 11 Mart 2020 17:50

Azərbaycandan olan ailə Almaniyaya bir neçə günlük səfər etsə də, yekunda üç ay qaçqın sığınacağında yaşamaq məcburiyyətində qalıb. Əsədovlar ailəsinin (30 yaşlı Nuray Əsədova, qardaşı Hüseyn, anası Rada, qayınanası Rəhilə, uşaqları - Rada və Atilla ilə) başına gələnlər barədə "Passauer Neue Presse" nəşri xəbər yayıb.

Sonxeber.net oxu.az-a istinadən xəbər verir ki, qohumların sözlərinə görə, federal polis onları Pirna (Saksoniya) yaxınlığında A17 avtobanında saxlayıb, pasportlarını və 5200 avro nağd pullarını müsadirə edib. Ailə iddia edir ki, niyyətləri olmasa belə, bundan sonra onların sığınacaq almaq üçün müraciət etməkdən başqa yolları qalmayıb.

Bəs necə olub ki, azərbaycanlı turistlər qaçqın sığınacağına düşüb? 

Pirnada federal polis idarəsindən Kristian Maynhold qohumların Almaniyada sadəcə gəzmək istəmələri barədə dediklərinə inanmır.

"Ailəyə qarşı sərhəddən qanunsuz keçmək şübhəsi ilə iş aparılır. 3 dekabr 2019-cu il tarixində yoxlama zamanı onlar yalnız Latviyaya qısamüddətli viza göstərə biliblər, həmin ölkədə hotel rezervasiyasını isə ləğv ediblər; bunun əvəzində Almaniyada qalmaq istəyiblər", - deyə o bildirib. 

Polis idarəsindən həmçinin bildirilib ki, Əsədovların deportasiyası dekabrın 6-na planlaşdırılıbmış, ancaq onlar sığınacaqdan qaçıblar.

Sonra azərbaycanlılar Hannoverdən sığınacaq istəyiblər, hazırda onlar Passauda (Bavariya) qaçqınlar üçün "lövbər mərkəzi"ndə yaşayırlar.

Qohumlar sığınacaq üçün müraciəti artıq geri götürüblər. Onlar deportasiya edilmədən, könüllü olaraq ölkəni tərk etmək istəyirlər.

Qeyd edək ki, Saksoniya əyalətinin Daxili İşlər Nazirliyi ötən ilin dekabr ayında Almaniyaya gedən Əsədovlar ailəsinin Azərbaycana deportasiya edilməsi üçün bütün prosedurların yekunlaşdığını və ailənin martın 11-də Azərbaycana göndərilməsinin gözlənildiyini bildirib.