3 mindən çox tibb müəssisəsi tam səfərbər olmuş vəziyyətdədir - TƏBİB

Tarix: 16 Mart 2020 22:06

Bakı. Trend:

TƏBİB tabeliyində olan 3 mindən çox tibb müəssisəsi tam səfərbər olmuş vəziyyətdədir.

Trend-in məlumatına görə, bunu "Tibbi Ərazi Bölmələrini İdarəetmə Birliyi" publik hüquqi şəxsin (TƏBİB) İdarə Heyətinin sədri Ramin Bayramlı deyib.

O bildirib ki, regionlarımızın əksəriyyətində müasir tibb mərkəzləri və infrastruktur var:

"Xəstələr daxil olan gün müayinə materialı götürülür, xəstəlik aşkar olunan şəxs xüsusi tibb mərkəzində izolyasiya edilir və müalicəyə alınır, digərlərin isə müşahidəsi davam etdirilir. Əgər 7-ci gün testin nəticəsi neqativ olarsa, o zaman evə buraxılırlar. Karantində saxlanılma müddəti 14-21 gün davam etdirilə bilər. Digər ölkələrdən gələnlər TƏBİB tibb məntəqələrinə yönləndirilir. Orada onların müvafiq müayinəsi həyata keçirilir. Əgər simptomları varsa karantinə göndərilir. Simptomları yoxdursa onlara bukletlər təqdim olunur və evə göndərilirlər".

Onun sözlərinə görə, sahə həkimlərinə və pediatrlara onlayn təlimlər keçirilir, alqoritm verilib: "Biz iki istiqamətdə iş görürük. Bütün poliklinikalarda "qaynar xətlər" ayrılıb. Dövlət Sərhəd Xidməti sərhədi keçmiş şəxslərin siyahısını elektron formada bizə göndərir. Lazımi tədbirlər görülür. Biz bu insanların vəziyyəti barədə daim məlumat alırıq. Bütün bu tədbirlər xəstəliyin yayılmasının qarşısını almağa yönəlib. Statistik göstəricilərdə artım yoxdur. Bu, onu göstərir ki, bu gün vəziyyət tam nəzarət altındadır".