Aktual mövzular: Dollar alış-satışı, Neftin qiyməti, COP29, Hava proqnozu

Elmar Məmmədyarov Özbəkistanın ölkəmizə yeni təyin olunmuş səfirini qəbul edib - FOTO

Tarix: 5 May 2020 16:45

Cari ilin 5 may tarixində Xarici İşlər naziri Elmar Məmmədyarov Özbəkistan Respublikasının Azərbaycan Respublikasına yeni təyin olunan səfiri Bahrom Aşrafxanovu qəbul edib.

Xarici İşlər Nazirliyindən Sonxeber.net-a verilən məlumata görə, səfir Bahrom Aşrafxanov etimadnaməsinin surətini nazir Elmar Məmmədyarova təqdim etdi.

Nazir Elmar Məmmədyarov Bahrom Aşrafxanovu səfir təyin olunması münasibətilə təbrik etdi və qardaş Özbəkistan səfirinə diplomatik fəaliyyətində uğurlar arzuladı.

Tərəflər Azərbaycan və Özbəkistan arasında mövcud olan dostluq və əməkdaşlıq münasibətlərinin inkişafından məmnunluq ifadə etdilər. Ticarət və nəqliyyat sahəsində əməkdaşlığın daha da inkişaf etdirilməsinin əhəmiyyəti qeyd olundu.

Mövcud pandemiya ilə mübarizə kontekstində ölkələr arasında qarşılıqlı dəstək və əməkdaşlığın zəruriliyi vurğulayan tərəflər, ümumdünya sağlamlıq böhranından sonrakı dövrdə ikitərəfli əməkdaşlıq gündəliyində duran tədbirlərin həyata keçirilməsi üzrə fikri mübadiləsi apardılar.

Tərəflər, həmçinin beynəlxalq təşkilatlar çərçivəsində əməkdaşlıq və qarşılıqlı maraq doğuran digər məsələləri müzakirə etdilər.