QDİƏT: Ermənistan etiraf etdi ki, zəmanət məktubu gəlib, ancaq parlamentin dəftərxanasında itirilib

Tarix: 21 Iyun 2019 11:54

Bakı. Trend:

Ermənistan nümayəndə heyətinin Qara Dəniz İqtisadi Əməkdaşlıq Təşkilatı (QDİƏT) Parlament Məclisinin Baş Assambleyasının Bakıda keçirilən 53-cü iclasında iştirakı üçün onlara zəmanət məktubları verilib.

Trend-in məlumatına görə, bunu QDİƏT Parlament Məclisinin baş katibi Asəf Hacıyev Ermənistan nümayəndə heyətinin iclasda iştirak etməməsinə münasibət bildirərkən deyib.

A.Hacıyev bildirib ki, Ermənistan nümayəndə heyəti həmişə olduğu kimi, öncədən dəfələrlə zəmanət məktubu istədi: “Həmin məktub da onlara verildi. Azərbaycan bir daha dünyaya göstərdi ki, burada hər kəs üçün lazımi təhlükəsiz şərait yaradılır. Ermənistan həmişə olduğu kimi, əvvəlcə zəmanət məktubu istəyir, düşünürlər ki, biz onlara məktub verməyəcəyik, nəticədə onlar da dünyaya səs salsınlar”.

A.Hacıyev əlavə edib ki, bundan əvvəl Bakıda keçirilmiş Assambleyada da ermənilər dəfələrlə məktub istəyiblər: “Məktub göndərildi, amma sonra dedilər ki, məktub göndərilməyib. Biz onlara isbat etdik ki, məktub göndərilib, təsdiqləmisiniz. Ondan sonra Ermənistan nümayəndə heyəti etiraf etdi ki, məktub gəlib, ancaq parlamentin dəftərxanasında itirilib. Bu, qeyri-ciddi bir məsələdir. Ermənilər oyun oynayırlar”.

Qeyd edək ki, ötən gün Bakıda Qara Dəniz İqtisadi Əməkdaşlıq Təşkilatı (QDİƏT) Parlament Məclisinin Baş Assambleyasının 53-cü iclası başlayıb. İclasın gündəliyinə QDİƏT-in iqtisadiyyat, ticarət, texnologiya və ekologiya, mədəniyyət, təhsil və sosial, eləcə də hüquqi və siyasi məsələlər komitələrinin toplantılarında müzakirə ediləcək mövzular daxildir. İclasda təşkilata üzv ölkələrin nümayəndə heyətləri ilə yanaşı, beynəlxalq qurumların təmsilçiləri, ayrı-ayrı dövlətlərin parlamentlərinin müşahidəçi qrupları iştirak ediblər.

İclasda Qara Dəniz İqtisadi Əməkdaşlıq Təşkilatı (QDİƏT) Parlament Məclisinin Baş Assambleyasına sədrlik Azərbaycandan Bolqarıstana keçib.

Trend-in ən mühüm və maraqlı xəbərlərini "Telegram"da izləyin