Avropa Komissiyası Avropa ölkələrinə səfər qaydalarını sadələşdirməyi tövsiyə edir

Tarix: 3 May 2021 21:12

Avropa Komissiyası Avropa İttifaqı ərazisinə səfərlərlə bağlı qaydaların sadələşdirilməsini tövsiyə edir.

Sonxeber.net AZƏRTAC-a istinadən bildirir ki, komissiyanın təklifinə əsasən, yaxın gələcəkdə qeyri-Aİ ölkələrindən (üçüncü ölkələrdən) turizm məqsədli səfərlərin həyata keçirilməsi mümkün olmalıdır. Aİ məkanına giriş üçün əsas şərt turistin epidemioloji vəziyyətin yaxşı olduğu ölkədən səfər etməsidir.

"Reuters" agentliyinin məlumatına görə, Avropaya daxil olmaq istəyən üçüncü ölkə vətəndaşları, eyni zamanda, istifadəsinə Aİ-də icazə verilmiş peyvəndlərdən biri ilə immunitetini təsdiqləyən sənəd təqdim etməlidir. Bildirilib ki, peyvəndlərin siyahısı Ümumdünya Səhiyyə Təşkilatı (ÜST) tərəfindən təqdim olunmuş vaksin siyahısı ilə də genişləndirilə bilər.

Koronavirusun yeni variantlarının "idxalı" riskini aşağı salmaq üçün komissiya "fövqəladə vəziyyət fasiləsi" adlı yeni mexanizmdən istifadəni tövsiyə edib. Həmin mexanizm Aİ üzvlərinə epidemioloji vəziyyətin ciddi şəkildə pisləşdiyi ölkələrlə səfər mübadilələrini ən qısa zamanda məhdudlaşdıra bilmək imkanı verməlidir.

Komissiyanın tövsiyələri mayın 4-də üzv ölkələrin müzakirəsinə çıxarılacaq.