''Qarabağda Almaniya Azərbaycana qarşı döyüşsəydi, şansımız olmazdı - Alman ekspert

Tarix: 14 Iyun 2021 11:36

Almaniyada fəaliyyət göstərən Müdafiə və Strateji Araşdırmalar İnstitutunun (GIDS) eksperti Maykl Karl müasir yeni silah texnologiyaları ilə bağlı önəmli açıqlamalar verib.

Sonxeber.net Türkiyə mediasına istinadən xəbər verir ki, ekspert alman ordusunun Dağlıq Qarabağda Azərbaycana qarşı döyüşə biləcəyi ehtimalını özünəməxsus şəkildə şərh edib. O, "əgər Qarabağda Almaniya Azərbaycana qarşı döyüşsəydi, Türkiyə SİHA-larına qarşı şansımız olmazdı. Xüsusilə Bayraktar TB2 və Kargu-2 son zamanlarda həm döyüş sahələrində, həm də İHA bazarında üstünlük təşkil etdilər" deyib.

Son vaxtlar Suriya, Liviya və Dağlıq Qarabağda həyata keçirilən "yeni müharibə qaydası"nı şərh edən ekspert pilotsuz uçuş vasitələrinin istifadəsinin vacibliyini vurğulayıb.

"Müasir döyüşdə yaşamaq üçün yeni texnologiyalara və ən son döyüş texnikalarına sahib olmalısan. Almaniya bu baxımdan o qədər də pis deyil, amma gələcəyin müharibə texnologiyaları bu sürətlə inkişaf etməyə davam edir. Alman ordusunun da bu sürətə davam etməsi lazımdır".

ABŞ, Çin, İsrail və Türkiyənin dünya bazarına hakim olduğunu deyən ekspert Türkiyənin son illərdə həm İHA ixracatı, həm də İHA-ların aktiv istifadəsi üçün əhəmiyyətli addımlar atdığını vurğulayıb.

Bayraktar TB2 SİHA-ların Liviya, Suriya və Dağlıq Qarabağ coğrafiyalarında aktiv, təsirli və uğurla istifadə olunduğunu xatırladan keçmiş hərbçi "Türkiyə istehsalı olan Kargu-2 pilotsuz təyyarələri düşməni yalnız süni zəka ilə müəyyən edərək uğurlu bir hücum həyata keçirdi" deyib.

Kamran Seyidov