Rüfətdən iki məhsuldar ötürmə

Tarix: 28 Aprel 2019 18:00

Almaniyanın üçüncü bundesliqasında 35-ci turun növbəti oyunu keçirilib.

Qol.az-ın məlumatına görə, milli komandamızın hücumçusu Rüfət Dadaşovun çıxış etdiyi "Proyssen" klubu səfərdə Braunşveyq "Ayntraxt"ının qonağı olub. Görüş 3:3 hesabı ilə başa çatıb.

Oyuna start heyətində başlayan Rüfət 90 dəqiqə meydanda qalıb. 27 yaşlı forvard bu matçda fərqlənə bilməsə də, ilk iki qolda məhsuldar ötürmə ilə yadda qalıb.

Qeyd edək ki, bu nəticədən sonra xallarının sayını 49-a çatdıran "Proyssen" 6-cı pilləyə yüksəlib. "Ayntraxt" isə 41 xalla 14-cüdür.