Qaraçay üzərindəki körpü uçmaq üzrədir - VİDEO

Tarix: 9 Fevral 2022 14:50

Goranboyun Zeyvə kəndində, Qaraçayın üzərində salınan körpü uçmaq üzrədir. 

Xezerxeber.az xəbər verir ki, həmin körpünü sakinlər özləri düzəldib. Çayda güclü sel olduğundan keçid vasitəsi sıradan çıxıb.

Sakinlərin köhnə dəmir parçları, taxta-şalbanla hazırladıqları körpü hazırda acınacaqlı vəziyyətdədir. Buradan böyüklərlə yanaşı kəndin kiçik sakinləri də istifadə edir. Onlar bağçaya, məktəbə getmək üçün körpüdən keçmək məcburiyyətindədirlər.

Qaraçayda su az olduqda oradan avtomobillərlə qarşı tərəfə keçmək mümkün olur. Elə ki sel gəldi, çayda su artdı, ümid qalır bu sınıq-salxaq körpüyə. Zeyvə sakinləri məcbur qalıb oradan həm özləri istifadə edir, həm də mal-qaranı keçirirlər.

Sakinlər bildirir ki, kənddə 2009-cu ildən bu yana körpü sarıdan problem yaşanır. Dəfələrlə adiyyəti qurumlara yazılı, şifahi müraciət edilsə də, onların istəkləri elə istək olaraq da qalıb.  Zeyvə kənd İcra nümayəndəliyi də məsələdən xəbardar olduğunu və bununla bağlı aidiyyəti üzrə məlumat verildiyini deyib.

Qeyd edək ki, Zeyvə kəndi Murovdağ  silsiləsinin ətəyində yerləşir. Əhalisi 2 min nəfərdən artıqdır.

Mövzu ilə bağlı daha ətraflı videomaterialı təqdim edirik: