Millətlər Liqasında yığmamızın son rəqibi

Tarix: 29 Mart 2022 22:40

Azərbaycan yığmasının Millətlər Liqasının qrup mərhələsindəki son rəqibi müəyyənləşib.

Qazaxıstan millisi C liqasının III qrupuna vəsiqə qazanıb.

Andrey Karpoviçin yetirmələri pley-off mərhələsində Moldovanı üstələyib. İlk görüşdə evdə 1:2 hesabı ilə məğlub olan moldovalılar cavab matçında İqor Armaşın 13-cü dəqiqədə vurduğu yeganə qolla 90 dəqiqəni öndə tamamlayıb. Ümumi hesab bərabərə olub - 2:2. Status-kvo sona qədər dəyişmədiyindən, penaltilər seriyasına ehtiyac duyulub. Burada daha dəqiq oynayan Qazaxıstan 5:4 hesablı qələbə qazanaraq, C liqasında qalıb. Moldova isə D liqasına yuvarlanıb.

Beləliklə, Qazaxıstan III qrupda Azərbaycan, Slovakiya və Belarusla mübarizə aparacaq. Yığmamız ilk oyununu isə iyunun 3-də səfərdə məhz Qazaxıstana qarşı keçirəcək.