Aktual mövzular: Dollar alış-satışı, Məzənnə, Neftin qiyməti

“SSRİ 70 il bizim vətənimiz olub, məktəblərdə buna normal baxmaq lazımdır” - Nəzakət Məmmədova

“SSRİ 70 il bizim vətənimiz olub, məktəblərdə buna normal baxmaq lazımdır” - Nəzakət Məmmədova

Tarix: 7 May 2022 20:32

"Ötən gün 164 saylı orta məktəbdə 9 May günü münasibətilə şagirdlərin yaxalarına "Georgi lenti"nin taxılmaqlarını, başlarına rus beretkasını qoymaqlarını SSRİ-nin təbliği saymıram. Çünki Georgiyevsk lenti Böyük Vətən müharibəsindəki qələbənin rəmzidir. Digər tərəfdən, SSRİ 70 il bizim vətənimiz olub".

Milli.Az demokrat.az-a istinadən bildirir ki, politoloq Nəzakət Məmmədova belə deyib.
 
N.Məmmədova tarixin olduğu kimi çatdırılmasının vacib sayır:
 
"Bilirsiniz ki, yüz minlərlə azərbaycanlı insan bu ölkə uğrunda vuruşub, həlak olub, qəhrəmanlıqlar göstərib. Bunun üstündən necə xətt çəkmək olar?! Tarix bizim istəyimizə uyğun olaraq yenidən yazılmır, dəyişdirilmir, düzəliş olunmur. O, necə varsa, elə təbliğ olunmalıdır. Bu gün dünyada gedən məsələlərin Böyük Vətən müharibəsinin tarixinə heç bir təsiri olmamalıdır".

Politoloq tarixi hörmət və ehtiramla yad etmək lazım olduğunu vurğulayıb:

"Milyonlarla insanın yolunda canını qurban verdiyi, məşəqqətlə əldə etdiyi qələbəni və onun rəmzlərini inkar etmək doğru addım sayıla bilməz. Həm də o qələbə təkcə Rusiyanın qələbəsi deyil, bütün müttəfiq respublikaların, bütün sovet xalqının qələbəsidir. Ona görə də, Rusiyaya qarşı olan təbliğatı bütövlükdə sovet tarixinə yönəltmək doğru deyil. Məktəblərdə buna normal baxmaq lazımdır. Elə bayramlar, tarixi hadisələr var ki, bir xalqın yox, bütün bəşəriyyətin bayramıdır, simvoludur. Doğrudur, Müqəddəs Georgi lenti Yekaterina dövründə təsis olunub, çar Rusiyasının təltif vasitəsi olub, çar Aleksandr, Kutuzov və b. onu daşıyıb. Hətta bolşevik inqilabından sonra bolşeviklər onu ləğv edib, Ağqvardiyaçılar isə imperiyanın və monarxiyanın rəmzi kimi qoruyub-saxlayıblar. Hətta, çox maraqlıdır ki, İkinci dünya müharibəsi zamanı həm SSRİ-yə qarşı vuruşan mühacir ruslar, həm də sovet əsgərləri döyüşdə fərqlənənləri təltif etmək üçün ondan istifadə edib. Doğrudur, SSRİ-də o, Qvardiya lenti adlanıb, "Almaniya üzərində qələbəyə görə" medalını bəzəyib. Elə bu il Litva seymi, Moldova parlamenti ona qadağa qoydu. Bu, təkcə Rusiyanın və ya SSRİ-nin simvolu yox, həm də Rusiya və antirus dünyanın müzakirə obyektidir".

"Düşünürəm ki, simvollarla mübarizə aparmaq yox, tarixə real baxmaq lazımdır. Axı, həmin dövrdə Azərbaycan müstəqil respublika olmayıb, SSRİ-nin bir parçası olub və bizdən də çox insanlar bu medallarla təltif olunub. Onda biz A.A. Bakıxanov, M.F. Axundov, Mirzə Kazım bəy və digər ədiblərimizdən imtina edək ki, onlar Rusiya imperiyası dövründə yaşayıb-yaradıb, rus dilindən istifadə ediblər?! Bu, həmin dövrün reallığıdır. Tarixi reallıqlarla vuruşmaq yox, ona obyektiv baxıb, ondan düzgün nəticə çıxarmaq lazımdır"-deyə politoloq əlavə edib.

Milli.Az


Etiketlər:  SSRİ 70 il bizim vətənimiz olub məktəblərdə buna normal baxmaq lazımdır Nəzakət Məmmədova


RƏYLƏR



Populyar Xəbərlər

XƏBƏR LENTİ