Ərinin külünü basdırmağa aparırdı, yolda itirdi

Tarix: 28 Oktyabr 2022 21:08

Böyük Britaniyanın Abergele şəhərindən olan 78 yaşlı Coys Cekson ərinin külünü ABŞ-da sevimli yerində basdırmağa hazırlaşırdı, lakin yolda çamadanını itirdiyi üçün bunu edə bilməyib.

Milli.Az bildirir ki, bu barədə "Daily Post" xəbər verir.

Britaniyalı tez-tez mərhum əri ilə istirahət etdiyi Florida ştatının Orlando şəhərindəki "Disney's Caribbean Beach Resort"-a səyahət edib. Dul qadın deyib: "Mən onun külünü və toy üzüklərimizi orada basdırmaq istədim".

Cekson uçuşdan əvvəl baqajını yoxlayıb, lakin Orlandoda onu ala bilməyib. Məlum olub ki, aviaşirkətin əməkdaşları hava limanında adamın külü olan çamadanını itiriblər. Qadın təkcə ərinin xatirəsini ehtiramla yad etmək imkanından yox, həm də öz əşyalarından məhrum olub. "Disney's Caribbean Beach Resort"-un əməkdaşları hadisədən xəbər tutaraq çətin vəziyyətdə olan Ceksona kömək ediblər. Britaniyalı mağazaya aparılıb və o, bütün lazımi əşyaları ala bilib.

Qadının sözlərinə görə, baqajının itirilməsinə baxmayaraq, o, "səyahətdən maksimum yararlanmaq" istəyib. Cekson qayıqlara və kanat avtomobillərinə minib, ərinin sevdiyi yerləri ziyarət edib.

Bir müddət sonra hava limanının növbətçisi çamadanın hərəkətini izləyib və onun İngiltərəni tərk etmədiyini öyrənib. Cekson yalnız iki həftə sonra, evə qayıdanda baqajı götürə bilib. "Mən kurorta qayıda bilməyəcəm, çünki pulum yoxdur və üstəlik, mənim 78 yaşım var", - o deyib.

Aviaşirkət işçiləri Ceksondan üzr istəyib.

İrfan Vəliyev
Milli.Az