İkiüzlü, qərəzli UNESCO bizə nə verdi?

Tarix: 15 Noyabr 2022 12:39

Azərbaycanın Birinci vitse-prezidenti Mehriban Əliyeva UNESCO-nun xoşməramlı səfiri kimi fəaliyyətini dayandırıb və bununla bağlı YUNESKO-nun baş direktoru, Fransanın keçmiş mədəniyyət naziri Odri Azuleyə məktub göndərib. Bu barədə UNESCO üzrə Azərbaycan Respublikasının Milli Komissiyasının bəyanatında deyilir.

Mehriban Əliyevanın qərarı, diplomatik dillə desək, UNESCO-nun xüsusilə son illərdə Azərbaycana qarşı nümayiş etdirdiyi ikitərəfli yanaşmaya bir növ etirazdır. 

Artıq bəllidir ki, UNESCO ilə əlaqələrin inkişafına, təşkilatın dəyərlərinin təbliği istiqamətində səylərə, bir sıra ölkələrdə mədəni irsin qorunmasına dəstək göstərilməsinə baxmayaraq, UNESCO Azərbaycanın çağırışlarına cavab verməyib. Ermənistanın işğal etdiyi ərazilərdə törətdiyi cinayətlər barədə mütəmadi olaraq UNESCO-ya məlumat verilməsinə baxmayaraq, son 30 il ərzində sözügedən beynəlxalq təşkiat Azərbaycanın mədəni irsinə dəyən zərərin qiymətləndirilməsi üçün missiya göndərməyib. Bəyanatda qeyd olunur ki, Azərbaycana qarşı birtərəfli mövqe nümayiş etdirən səbəblər arasında fransız əsilli təşkilatın baş direktorunun olması da istisna edilmir.

Eyni zamanda, qurumun bəyanatında deyilir ki, hələ 2005-ci ildə baş direktor Koişiro Maatsuranın rəhbərliyi ilə UNESCO missiyanın göndərilməsinə mane olan səbəb kimi Azərbaycanın çağırışını, Azərbaycan ərazilərinin Ermənistan tərəfindən işğalını göstərib. "Təşkilatın əvvəlki direktorlarının bu və digər qismən ədalətli mövqelərinə, UNESCO-nun prinsiplərinə hörmət etmələrinə baxmayaraq, ehtimal olunur ki, Odri Azulenin yanaşmalarının əsasında Fransanın Azərbaycana qarşı apardığı qarayaxma kampaniyası və onun Bakıya qarşı mübahisəli mövqeyi dayanır", - sənəddə vurğulanır.

Milli.Az