Modul kompüterlər konsepsiyası nümayiş olunub

Tarix: 9 Oktyabr 2019 10:56

“Intel” şirkəti Londonda keçirilən təqdimatda modul kompüterlər konsepsiyasını və belə fərdi kompüterlər üçün hazır modul variantını nümayiş etdirib.

“ICTnews” Elektron Xəbər Xidməti “4PDA” resursuna istinadən yazır ki, şirkət tərəfindən bütün fərdi kompüter komponentlərinin kiçik bloklara yerləşdirilməsi təklif edilir. Plana görə, bu, fərdi kompüterin yenilənməsini asanlaşdıracaq – istifadəçi mövcud modulu çıxararaq onu daha yaxşı texniki xüsusiyyətlərə malik yenisi ilə əvəzləyə biləcək.

Bundan başqa, təqdimatda xarici görünüşünə görə ikiçıxışlı videokartı xatırladan “Element” blokunun prototipi nümayiş olunub. Onun tərkibinə “Xeon” prosessoru, “DDR4” operativ yaddaşı üçün iki slot və bərkcisimli toplayıcılar üçün iki M.2 çıxışı daxildir.

Modul 225 vatlıq enerjidən istifadə üçün nəzərdə tutulan 8 kontaktlı enerji doldurma çıxışı, iki “Thunderbolt 3” portu, tamölçülü “HDMI” çıxışı, 3,5 millimetrlik audioçıxış birləşdiricisi, dörd “USB Type-A” (USB 3.2) portu və iki “RJ-45” şəbəkə çıxışları ilə təchiz edilib.

Bildirilir ki, kommersiya həllərinin təqdimatı 2020-ci ilin birinci rübünə planlaşdırılır.

Nizam Nuriyev