FHN əhaliyə müraciət etdi - VİDEO

Tarix: 3 May 2023 09:44

Fövqəladə Hallar Nazirliyinin Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyi səlahiyyətlərinə uyğun olaraq sənayedə və dağ-mədən işlərində texniki təhlükəsizlik tələblərinin təmin olunması istiqamətində müvafiq tədbirlərin görülməsini davam etdirir.

Fövqəladə Hallar Nazirliyindən Sonxeber.net-a bildirilib ki, bu çərçivədə həyata keçirilən tədbirlər zamanı bəzi işbazlar tərəfindən qanunvericiliyin, habelə texniki təhlükəsizlik qaydalarının tələblərinin pozulması ilə həyətyanı sahələrdə, əhalinin sıx məskunlaşdığı yaşayış ərazilərində yanacaq çənlərinin yerləşdirilərək istismar edilməsi, yanacağın plastik qablarda satışının təşkili faktları aşkar olunur. Bu isə ciddi pozuntu olmaqla, orada hər an baş verə biləcək yanğın və ya partlayış hadisəsi ilə insan həyatı və sağlamlığını real təhlükə ilə üz-üzə qoyur. Aşkar olunan hər bir belə faktla əlaqədar Agentlik tərəfindən qanunvericiliyə uyğun sərt tədbirlərin görülməsi təmin edilir.

Qeyd olunanlarla bağlı Fövqəladə Hallar Nazirliyi əhaliyə müraciət edərək, "xüsusi icazə"si olmadan yanacaq çənlərinin istismar edilməsinin, o cümlədən plastik qablarda satışının qanunla qadağan olunduğunu xatırladır və vətəndaşlar tərəfindən belə faktlar aşkar olunduqda Nazirliyin "112" qaynar telefon xəttinə məlumat verilməsini tövsiyə edir.