Zığ gölünün təmizlənməsi niyə gecikdirilir? - VİDEO

Tarix: 15 Avqust 2023 14:42

Paytaxt mərkəzinə ən yaxın göllərdən biri sayılan Zığ gölündə ekoloji vəziyyət günü-gündən pisləşir.

Sonxeber.net Xəzər TV-yə istinadən bildirir ki, 9 ildir gölün bərpası ilə bağlı ölkə başçısı tərəfindən sərəncam imzalanıb.

Sərəncama əsasən, təxminən 300 hektara yaxın ərazisi olan göl və ətrafı neft və digər təhlükəli maddələrdən təmizlənməli, insanların istirahət və əyləncəsi üçün şərait yaradılmalı idi 

''Azərsu''dan bildirildi ki, sözügedən ərazidə layihə tam yekunlaşmayıb. Bu səbəbdən hələ də Zığ qəsəbəsinin bir hissəsinin tullantı suları təmizlənmədən gölə axıdılır.

Göl ətrafında nəhayət real işlərə başlanıb. Artıq Ekologiya və Təbii Sərvətlər Nazirliyi tərəfindən gölün təmizlənməsi işləri İqtisadiyyat Nazirliyinin rezidenti olan şirkətlərdən birinə həvalə olunub.

Şirkətin icraçı direktoru Vüsal Həsənov bildirib ki, zavod yaxın günlərdə istifadəyə veriləcək və neft tullantılarının təmizlənməsinə başlanacaq. Torpağın çirkliliyindən asılı olaraq zavodun gündəlik 350 tondan 750 tona tullantı təmizləmək gücü var. Ümumilikdə zığ gölünün 2 il ərzində tam bərpası nəzərdə tutulur.

Yeni layihədə Zığ gölünün 120 hektar su hövzəsinin tam təmizlənməsi, ümumilikdə gölün sahəsinin 40 h-a qədər kiçildilməsi nəzərdə tutulub. Həmçinin gölün xəzər dənizi ilə əlaqəsi də tam bərpa ediləcək.

Mövzu ilə bağlı daha ətraflı videomaterialı təqdim edirik: