Fransa ordusu Ermənistana yerləşir: Əlvida KTMT

Tarix: 24 Oktyabr 2023 15:46

Fransa Ermənistana hansı silahları vermək niyyətindədir? Həm Paris, həm də İrəvan qeyd edirlər ki, bunlar yalnız müdafiə silahlarıdır. Hələlik tam təfərrüat açıqlanmayıb.

Milli.Az axar.az-a istinadən bildirir ki, bunu Xəzər Strateji Araşdırmalar İnstitutunun baş direktoru, hərbi ekspert İqor Korotçenko deyib.

"Aydındır ki, hava hücumundan müdafiə sistemləri olacaq. Əslində, yalnız şərti olaraq hava hücumundan müdafiə sistemlərinin müdafiə silahları olduğunu güman etmək olar. Məsələn, İrəvan silahlı təxribat törətmək qərarına gəlsə, o zaman bunu müdafiə silahı adlandırmaq çətindir. Fransa silah istehsalçısı olaraq ilin sonundakı göstəricilərə görə, ilk üç əsas qlobal silah təchizatçısından biridir. Fransanın çox geniş silah çeşidi var. Bu, bütün əsas silah növlərinin Avropa istehsalı üçün müstəqil mərkəzdir. Ancaq sual yaranır: Ermənistan Fransa silahlarını əlində olan sovet sistemləri ilə necə birləşdirəcək? Həmçinin, silahların tədarükü həm də ölkəyə xarici hərbi mütəxəssislərin gəlməsini nəzərdə tutur ki, onlar tədarük olunan hərbi texnikanın əməliyyat və döyüş istifadəsi üçün yerindəcə erməni hərbi qulluqçularına təlim keçməlidirlər", - o bildirib.

Korotçenko qeyd edib ki, silahlardan sonra Ermənistanda Fransa hərbi komponenti peyda olacaq ki, bu da ilkin olaraq 100 nəfərə qədər hərbi məsləhətçi və mütəxəssis şəklində ola bilər:

"Gələcəkdə hazırlanmış qarşılıqlı fəaliyyət variantları əsasında lazımi şərait yaranan kimi Fransanın İrəvanda tammiqyaslı hərbi mövcudluğu yaradıla bilər. Bunun birdən-birə və eyni vaxtda elan edilməsi mümkündür. Bundan əlavə, KTMT çərçivəsində birgə hava hücumundan müdafiə sistemi mövcuddur. Ermənistanın NATO üzvü olan dövlətlə hərbi sahədə əməkdaşlığı müttəfiqlik əlaqələrinin kəsilməsi və Ermənistanın KTMT-nin bütün sazişlərindən çıxmasını nəzərdə tutur. Gec-tez bu baş verəcək. Ermənistanın NATO silah standartlarına keçəcəyini anlamaq vacibdir. Və bu əsas məqamdır. Bu o deməkdir ki, respublika Rusiya silahlarının istifadəsinə əsaslanan əvvəlki bütün hərbi sistemdən imtina edəcək".

Milli.Az