Bir şəklin tarixçəsi - İki məşhur, iki mərhum...

Tarix: 3 Yanvar 2024 01:36

İki sənətkar, iki nadir səs... Ağayana və ağır baxışlı aktyor Səməndər Rzayev və yanıqlı səsi ilə qəlbləri kövrəldən xanəndə Səxavət Məmmədov...

İki məşhur sima, iki mərhum... 

Sonxeber.net xəbər verir ki, modern.az saytının "Bir şəklin tarixçəsi" rubrikasında təqdim etdiyi bu fotoşəkil 80-ci illərin sonlarında çəkilib.

Azərbaycan xalqının ürəyində yer almış Səməndər Rzayevin və Səxavət Məmmədovun bulaq kimi təmiz, şaqraq səsi indi də qulağımızdan getmir.

Folklor nümunələrini radionun "Bulaq" verilişində özünəməxsus çalarla oxuyan Səməndər Rzayevin təkrarolunmaz səsi Səxavət Məmmədovun "Sarı bülbül"ü ilə həmahəng idi...  
 
İkisi də cavankən həyata vida dedilər.. Sənətlərinin ən yaxşı vaxtlarında...

Amma onlar bu fani dünyada yaşadıqları qısa ömürlərində səslərini xalqın yaddaşına yaza bildilər. Onları dinləyəndə qeyri-ixtiyari ömürümzün arxada qalmış ən şirin xatirələrinə boylanırıq, əlimizdə olan işləri bir kənara buraxır, acgözlüklə bu sənətkarların səsini dinləyirik. 100 dəfə dinlədiyimizə baxmayaraq...

Bu, çox az adamlara qismət olan bir ömürdür...

2 yanvar tarixi Səməndər Rzayevin doğum günüdür. Görkəmli sənətkar cəmi 41 il yaşayıb.

Səməndər Rzayev Azərbaycan kinosunda dublyaj sənətinin korifeylərindən idi.

Onun səsi, danışığı bir orkestrin ifa etdiyi simfoniyaya bərabər idi - ahəngli, ürəyə yatımlı...

Əməkdar artist, Dövlət mükafatı laureatı Səməndər Rzayev 27 mart 1986-cı ildə qaraciyər serrozundan dünyasını dəyişib.