Xaçmazda Ümummilli Lider Heydər Əliyevin əziz xatirəsi dərin hörmət və ehtiramla anılıb (FOTO)

Tarix: 12 Dekabr 2025 18:18

Xaçmaz rayonunda Ümummilli Lider Heydər Əliyevin əbədiyyətə qovuşmasının iyirmi ikinci ildönümü ilə əlaqədar anım tədbiri keçirilib.

Rayon İcra Hakimiyyətinin başçısı Elnur Rzayev, Yeni Azərbaycan Partiyası Xaçmaz rayon təşkilatının sədri Məhəmməd Balaqadaşov, yerli hüquq-mühafizə orqanlarının, idarə, müəssisə və təşkilatların rəhbərləri, eləcə də şəhid ailələri, ziyalılar, ağsaqqallar və gənclər Xaçmaz şəhərinin mərkəzində ulu öndər Heydər Əliyevin abidəsi önünə gül-çiçək dəstələri düzərək əziz xatirəsini ehtiramla yad ediblər.

Xaçmaz Rayon İcra Hakimiyyəti tərəfindən Ümummilli Lider Heydər Əliyevin anım günü ilə əlaqədar şəhid ailələri, qazilər və rayon ictimaiyyəti üçün ehsan süfrəsi açılıb.

Mərasimdə Azərbaycan Respublikasının Dövlət Himni səsləndirilib. Ulu öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, ruhlarına dualar oxunub.

Çıxış edənlər Azərbaycan dövlətinin qurucusu və memarı, dünya şöhrətli siyasətçi, dövlət xadimi, dahi şəxsiyyət Heydər Əliyevin Vətən və xalq qarşısında misilsiz xidmətlərindən bəhs ediblər. Heydər Əliyev siyasətini uğurla davam etdirən Prezident cənab İlham Əliyevin rəhbərliyi ilə ordumuzun qazandığı tarixi Zəfərdən danışıblar.

Qeyd edilib ki, nə qədər müstəqil Azərbaycan dövləti və xalqı var, ulu öndər Heydər Əliyev də ürəklərdə yaşayacaq.