Dmitri Solonnikov: ''Avropa Parlamentinin qəbul etdiyi qətnamə Azərbaycanın ciddi diplomatik qələbəsidir''

Tarix: 16 Yanvar 2020 14:18

Avropa Parlamentinin Azərbaycanın ərazi bütövlüyünü dəstəkləyən və avropalı məmurları Avropa İttifaqının xarici siyasətinə əməl etməsinə məcbur edən "Avropa İttifaqının xarici siyasət və təhlükəsizlik sahəsində ümumi siyasəti barədə" qətnaməni qəbul etməsi Azərbaycanın ciddi diplomatik qələbəsidir.

Sonxeber.net xəbər verir ki, bunu Trend-ə rusiyalı politoloq Dmitri Solonnikov deyib. Onun sözlərinə görə, bu sənəd bəzi müddəalara əsaslanaraq Dağlıq Qarabağ münaqişəsi ilə bağlı bəzi məsələləri müzakirəyə çıxarmağa və daha konkret sənədlər qəbul etməyə imkan verəcək: "Azərbaycan tərəfinin öz mövqeyinin təbliğ olunmasında daha çox əsası olacaq. Bu, həm də Dağlıq Qarabağ münaqişəsindən əziyyət çəkmiş məcburi köçkünlərin problemlərinə də şamil oluna bilər".

Avropa Parlamentinin ayr-ayrı deputatlarının mövqeyinə gəldikdə isə politoloq bildirib ki, onların adətən bu və ya digər məsələlərin hüquqi parametrlərilə bağlı öz təsəvvürləri olur, ona görə də bu məsələdə illüziyaya qapılmaq lazım deyil: "Bu qətnamənin qəbul olunmasına səs vermiş deputatlar çətin ki, özlərini onun çərçivələri daxilində məhdudlaşdırılmış hiss etsinlər. Bu, həm alternativ məlumatların yayılmasına, həm də Ermənistan tərəfinin dəvəti ilə Azərbaycanın işğal olunmuş ərazilərinə səfərlərə aiddir".

D.Solonnikov sonda əlavə edib ki, qəbul olunmuş "Avropa İttifaqının xarici siyasət və təhlükəsizlik sahəsində ümumi siyasəti barədə" qətnamə Azərbaycanın xarici siyasi uğurudur, amma bu, yekun qələbə deyil.