Aktual mövzular: Dollar alış-satışı, Neftin qiyməti, COP29, Hava proqnozu

Yeniyetməmiz karate üzrə Avropa çempionu oldu - FOTO

Tarix: 8 Fevral 2020 12:54

14-15 yaşlı yeniyetmələrdən ibarət seçmə komandanın üzvü Fərid Savadov (-57 kq, şəxsi məşqçisi Əziz Əzizov, seçmə komanda məşqçisi Anar Allahverdiyev) Avropa çempionu olub.

Milli Karate Federasiyasından Sonxeber.net-a verilən məlumata əsasən, finaladək monteneqrolu, serbiyalı, ukraynalı və kosovalı rəqiblərini məğlub edən perspektivli idmançımız həlledici görüşdə polşalı karateçiyə qalib gələrək, ilk dəfə çıxış etdiyi nüfuzlu yarışın qızıl medalını qazanıb.

Digər idmançılarımızdan Arina Bezrebra (+54 kq) və Həsənəli Həsənəliyev (kata) isə təsəlliverici mərhələnin bürünc medal uğrunda görüşlərdə qələbəni əldən veriblər. Azərbaycan Milli Karate Federasiyasının prezidenti və Avropa Karate Federasiyası İdarə heyətinin üzvü Yaşar Bəşirov fərqlənən idmançıları mükafatlandırma mərasimində iştirak edib.

7-9 fevral tarixlərində Macarıstanın paytaxtı Budapeştdə Yeniyetmə və Gənclərin 47-ci, 21 yaşadək karateçilərin isə 12-ci Avropa Çempionatı davam edir. Mötəbər qitə yarışında 52 ölkədən 1155 idmançı mübarizə aparır.