Noutbuk tədarükü 27% artıb — İlk beşlikdə hansı şirkətlər var?

Tarix: 18 Avqust 2020 07:44

Cari ilin ikinci rübündə noutbukların dünya üzrə tədarükü 27% artıb.

Sonxeber.net ted.az-a istinadən bildirir ki, bu barədə Strategy Analytics şirkəti məlumat yayıb.

Noutbukların beş ən böyük təchizatçısı arasında yüksəliş müşahidə edilib. Bazarın təxminən 50%-i Lenovo və HP Inc şirkətlərinə məxsusdur. Müsbət dinamikanı məhz COVİD-19 pandemiyası ilə əlaqələndirirlər.

Mütəxəssislərin sözlərinə görə, bazar liderləri demək olar ki, eyni göstəricilərlə ikinci rübü tamamlayıblar. Bu müddət ərzində Lenovo 13,6 milyon noutbuk və ya ümumi həcmin 25%-ni, HP isə 13,4 milyon cihaz və ya ümumi nəticənin 24,8%-ni istehsal edib.

Dell və Apple eyni artımı göstəriblər - 2019-ci ilin nəticələrinə nisbətən noutbuk tədarükü 21% artıb. Dell şirkəti 8,4 milyon noutbuk, yaxud ümumi həcmin 15,6%-ni, Apple isə 4,6 milyon noutbuk və ya ümumi həcmin 8,5%-ni istehsal edib.

Acer noutbuk tədarükçülərin beşliyinin axırıncı nümayəndəsidir. Tayvanlı vendorun noutbuk tədarükü 40%-dən çox artıb. Nəticədə Acer-in bazar payı 6,1%-dən 6,7%-ə yüksəlib.