"Yaşma" xüsusi təyinatlıları erməni işğalçıları üçün kabusa çevrildi

Tarix: 22 Dekabr 2020 16:21

Qazaxıstanlı politoloq, "Qazaxıstan Gənclərinin Səsi" ictimai təşkilatının rəhbəri Asxat Kasengali Qarabağ müharibəsində Azərbaycanın qazandığı uğurlarda xüsusi təyinatlı qüvvələrin rolunu yüksək qiymətləndirib.

Milli.Az Vestnik Kavkaza-ya istinadən xəbər verir ki, mütəxəssisin sözlərinə görə, Azərbaycan ordusunun gücü müasir silahlar, güclü aviasiya, misilsiz kəşfiyyat əməliyyatları və xüsusi təyinatlılarla bağlıdır. Xüsusi təyinatlıların təlimindən video Pandora YouTube kanalında yayımlandı.

"Burada xüsusi təyinatlılar qeyd edilməlidir. Azərbaycanın Qarabağa qayıtmasında xüsusi təyinatlıların payı böyükdür. Xüsusilə Azərbaycanda Yaşma qəsəbəsi yaxınlığında yaradılan "Yaşma" xüsusi təyinatlıları. Bu birləşmələr erməni işğalçıları üçün qorxulu yuxu oldu. Onların yüksək səviyyədə hazırlıq və xüsusi taktikaları düşmən qoşunlarına dəfələrlə zərbə vurdu", - Kasengali deyib.

100 nəfərdən yalnız 4-5 nəfər Azərbaycanın xüsusi təyinatlı qüvvələrinə düşür, xüsusi təyinatlılar yalnız əla fiziki xüsusiyyətlərə malik olmamalı, eyni zamanda bir neçə dildə danışmalıdırlar. "Komandoslar Azərbaycan, türk, rus dillərini bilir. Yarısı da ingilis və erməni dillərini bilir", - politoloq bildirib.

Azərbaycan xüsusi təyinatlıları mütəmadi olaraq türk və pakistanlı həmkarları ilə birlikdə məşq edirlər. Bundan əlavə, Skandinaviya ölkələrində təlimlər keçirilir ki, xüsusi təyinatlılar hər cür hava və əraziyə hazır olsunlar.

Xüsusi təyinatlılar hər növ hərbi birləşmələrə daxil edilir: dəniz, hava, quru. Xüsusi hərbi dəniz qüvvələri "Pələng"in Xəzərdə yerləşdirildiyi məlumdur.

Azərbaycan xüsusi təyinatlıları ən müasir silahlarla təmin olunur. "Buna görə də Türkiyə, Rusiya, İsrail və NATO ölkələrinin silahları bu bölmələrin ayrılmaz hissəsinə çevrildi", - ekspert vurğulayıb.

Aslan Məmmədov
Milli.Az