3 mindən çox ödəniş terminalı yeni əsginaslara uyğunlaşdırılacaq

Tarix: 15 Yanvar 2021 12:04

Bakı. Sədrəddin Ağcayev. Orxan Nəbiyev - Trend:

Azərbaycanda "eManat" ödəniş terminalları şəbəkəsini idarə edən "MPAY" QSC hazırda terminalların yeni əsginasları qəbul etməsi üçün proqram təminatının optimallaşdırılması üzrə işlər aparır.

Bunu Trend-ə "eManat"ın marketinq üzrə mütəxəssisi Ayşən Həsənova deyib.

Onun sözlərinə görə, ölkədə 3 mindən çox terminalın proqram təminatı optimallaşdırılacaq:

"Bundan başqa, biz nağdsız ödənişlər sahəsində veb və mobil tətbiqlər vasitəsilə "eManat+" xidmətini təklif edirik. Ödəniş terminalları ilə "eManat+" onlayn xidmətini müqayisə etsək, nağd ödənişlərin daha geniş yayıldığı terminallar liderlik edir".

O qeyd edib ki, buna baxmayaraq, 2019-cu illə müqayisədə 2020-ci ildə "eManat+" vasitəsilə ödənişlərin sayı artıb:

"Həm terminallar, həm də "eManat+" vasitəsilə daha çox mobil rabitə xidmətləri və kommunal xidmətlər üzrə ödənişlər həyata keçirilir. Biz daim proqram təminatını təkmilləşdiririk və istifadəçilərə terminallar və "eManat+" onlayn platforması vasitəsilə hərtərəfli ödəniş imkanları təqdim edirik".

Qeyd edək ki, Mərkəzi Bank bu ay Azərbaycanda 1, 5 və 50 manatlıq yeni əsginaslar dövriyyəyə buraxacaq.