''Efir yoxdur deyə Namiq müəllim bunların yadından çıxıb”

Tarix: 22 Dekabr 2021 20:20

Bu gün Xalq artisti, xanəndə Sabir Əliyevin anım günüdür.

Sonxeber.net qaynarinfo-ya istinadən xəbər verir ki, aşıq Namiq Fərhadoğlu açıqlamasında Sabir Əliyevə qarşı sənət adamları tərəfindən laqeyd münasibət olduğunu deyib:

"Sabir Əliyev çox yaxşı insan idi, heyif onun kimi sənətkardan. Qonşu idik, günün çox hissəsini bir yerdə keçirirdik. Mən yaxın dostumu, sirdaşımı itirdim. Hər dəfə efirə çıxanda, sosial şəbəkələrdə çıxışlarımda onu yad edirəm, Sabir Əliyev əvəzolunmaz sənətkar idi. İstər insan, istər şəxsiyyət, istərsə də dost kimi. İncəsənət aləmində onun kimi ikinci bir adam tanımıram. Onun mərdliyi, kişiliyi... Xəstə olan vaxtlarda bir dəfə xəstəliyini dilinə gətirmədi. Koronadır da, hamımızın başına gələ bilər. Sabir Əliyevdən danışanda həmişə ürəyim parçalanır. Allah rəhmət eləsin - Baloğlan Əşrəfov, Səyyad Əlizadə və başqaları da dostlarımız idi, amma Sabir Əliyevlə biz tez-tez görüşürdük. Onun ölümü bizə çox pis təsir etdi. Bu gün Sabir müəllimə il mərasimi verilir. Bilmirəm bu bir ildə sənət adamlarından onun ailəsinə gedən-gələn olub, ya yox. O vaxt Sabir müəllim dünyasını dəyişəndə çox az adam gəldi. Heç media işçilərindən də heç kim yox idi. Ondan sonra sənət adamlarından bir qadın dünyasını dəyişdi. Hamı ordaydı, halbuku arada bir həftə vaxt vardı. Nəsə rəhmətliyə ögey münasibət bəsləyirdilər".

Namiq Fərhadoğlu sənət adamlarının bəzilərini etibarsızlıqda günahlandırıb:
"6 ay olar ki, "Lider" televiziyası bağlanıb. Ayrı vaxt telefonum dayanmırdı: "ay Namiq hardasan" deyə bütün günü məni axtarırdılar. İndi görürəm efir yoxdur deyə Namiq müəllim bunların yadından çıxıb".

Qeyd edək ki, Xalq artisti Sabir Əliyev koronavurusa yoluxmuşdu. Həkimlərin səyinə baxmayaraq, sənətkar dekabrın 22-də dünyasını dəyişib.