İnsanlar maska taxmaqdan bezib - Həkim

Tarix: 3 Mart 2022 20:42

İnsanlar maska taxmaqdan bezib.

Sonxeber.net Axar.az-a istinadən xəbər verir ki, bunu Qaynarinfo-ya açıqlamasında professor Adil Qeybulla Türkiyədə tibbi maska taxmaq məhdudiyyətinin ləğvi haqda danışarkən deyib.

Onun sözlərinə görə, pandemiya ilə əlaqədar qoyulan məhdudiyyətlər yavaş-yavaş aradan qaldırılacaq:

"Hər halda Türkiyədə kifayət qədər böyük və inkişaf edən bir səhiyyə var. Omikron ştammı demək olar ki, vaksindən çox fəaliyyət göstərdi, yəni kollektiv immunitetin yaranmasında ciddi bir rol oynadı. Omikron ştammına vaksin olunan və olunmayanların hamısı xəstələndi. Görünən odur ki, Omikron ştammının göstərdiyi perfomansı nəzərə alaraq, belə bir qərar verilib. Qərar hardasa başadüşüləndir".

Adil Qeybulla bu qərarı vəziyyətə uyğun, pandemiya müddətində əhalinin əsas qismində immunitetin yaranmasını nəzərə alaraq verilən optimal, adekvat qərar hesab edir.

Qeyd edək ki, Türkiyədə tibbi maska taxmaq məcburiyyəti ləğv olunub. Bu barədə Türkiyənin səhiyyə naziri Fəxrəddin Qoca məlumat verib. Artıq açıq havada və havalandırılması olan qapalı yerlərdə maska taxmaq qaydası aradan qaldırılıb.