Rusiya Severodonetskə hücumunu davam etdirir

Tarix: 7 Iyun 2022 11:00

Rus qoşunları Severodonetskə hücum edir, döyüşlər davam edir, lakin Novooxtırka və Voronovoye istiqamətindəki hücum dəf edilib.

Milli.Az bildirir ki, bu haqda Luqansk Regional Hərbi Administrasiyasının rəhbəri Sergey Qayday Telegram-da yazıb.

"İndi düşmən Severodonetsk üzərinə hücumu davam etdirir, döyüşlər davam edir. Rusların Novooxtırka və Voronovoye istiqamətində hücumu da dəf edilir. Beloqorovka ərazisində düşmən təxribat və kəşfiyyat qruplarından istifadə edir", -  qeyd edib.

Administrasiyasının rəhbəri həmçinin bildirib ki, iyunun 6-da ruslar Lisiçanskda bazarı, mədən kollecini və məktəbi atəşə tutublar - orada iki nəfər yaralanıb.

Bazarda yanğın baş verib - 1000 kvadratmetr sahədə yanğın yalnız günorta saatlarında söndürülüb.

Lisiçanskda və Privolyedə daha üç yaralı - iki kişi və bir qadın digər rayonların tibb müəssisələrinə yerləşdirilib.

Həmçinin iyunun 6-da səhər saatlarında Rusiya Zolotoye şəhərini atəşə tutub, burada ilkin məlumatlara görə, bir anda 13 ev dağıdılıb. Günortadan sonra ruslar Qorskoye şəhərini vurdular - 11 evə ziyan dəydi.

Ukrayna silahlı qüvvələri ötən sutka ərzində Rusiyanın 10 hücumunu dəf edib, 1 tank, 3 artilleriya sistemi, 2 zirehli döyüş maşını, 1 avtomobil və 2 sursat anbarını məhv edib.

Hava Hücumundan Müdafiə bölmələri Orlan-10 tipli 2 pilotsuz uçuş aparatını vurub.

Aslan Məmmədov
Milli.Az