Sülh prosesində paradoks: İrəvan “ehtiyat” edir

Tarix: 19 Yanvar 2024 14:12

2024-cü ilin gəlişi ilə Ermənistan və Azərbaycan arasında sülh sazişinin hazırlanması Qafqaz gündəliyinin əsas məsələlərindən birinə çevrilib. Eyni zamanda, iki ölkənin liderləri hələ də sülhün perspektivlərini fərqli qiymətləndirirlər. Bakı sazişlərin heç bir beynəlxalq qarantın olmayacağı "kamera" xarakterini müdafiə edir, İrəvan isə əksinə, sülh layihəsinin hazırlanması və həyata keçirilməsində fəal kənar iştirakda israr edir.

Sonxeber.net axar.az-a istinadən bildirir ki, bu sözləri ermənipərəst rusiyalı politoloq Sergey Markedonov sosial şəbəkə hesabında yazıb.

"Aydın olur ki, tərəflərin dəfələrlə bir-birinə ötürdüyü müəyyən mətn özlüyündə regionda davamlı sülhün təməli ola bilməz. Təfərrüat və nüanslar barədə razılaşma olmadan istənilən saziş xoş arzular toplusu olaraq qalacaq. Bu kontekstdə ən mühüm mövzu dövlətlərarası sərhədin demarkasiyası və delimitasiyasıdır. Yanvarın sonunda bu məsələ ilə bağlı müvafiq komissiyanın iclasının keçirilməsi nəzərdə tutulub. Gözlənilir ki, görüş zamanı tərəflər sərhəd xətlərinin dəqiq müəyyənləşdirilməsi ilə bağlı sənədləri razılaşdıra biləcəklər. Yeri gəlmişkən, yanvar görüşünün yeri və vaxtı hələ dəqiqləşdirilməyib.

Amma danışıqlar aparılsa belə, onlardan irəliləyiş gözləmək çətindir. Şərhçilər Prezident İlham Əliyevin bu yaxınlarda Azərbaycan mətbuatının nümayəndələri ilə görüşünə diqqət yetirirlər. Azərbaycan rəhbəri bir daha Zəngəzur dəhlizi mövzusunu qabardıb ki, bu, yumşaq desək, İrəvanın ehtiyatlı olmasına səbəb olur. Bu layihədə çoxları (xüsusən də Paşinyanın əleyhdarları) Qarabağın itirilməsindən sonra artıq Ermənistanın suverenliyini itirmək riskini görür. Əliyevin "təxribatı"na reaksiya gözlənilən idi. Paşinyan onları "sülh prosesinə ciddi zərbə" adlandırıb.

Nəticədə paradoksal vəziyyət yaranır. Tərəflər daim sülhdən və ən qısa zamanda müqavilələrin imzalanmasının vacibliyindən danışırlar. Amma real problemlərlə üzləşəndə uyğunsuzluqlar yaranır ki, bu da sonradan ya vaxtın gecikdirilməsi, ya şantaj, ya da sülh prosesinin sabotajı kimi şərh olunur", - Markedonov qeyd edib.