“Qarabağ”ın hücumçusu İkardi, Qrizmann və Vlahoviçi qabaqladı - ARAŞDIRMA

Tarix: 25 Yanvar 2024 17:46

""Qarabağ"ın futbolçusu Olavio Juninyo 2023/2024 mövsümündə milli çempionatlarda vurulan qol sayına görə dünyanın ən məhsuldar 60 bombardiri sırasına düşüb.

Sonxeber.net "report"a istinadən bildirir ki, braziliyalı hücumçu Azərbaycan Premyer Liqasında vurduğu 13 qolla bunu reallaşdırıb.

27 yaşlı forvard hazırda planetin ən məhsuldar oyunçuları arasında 42-58-ci pillələri bölüşdürür. Onunla eyni göstəriciyə malik olanlardan biri də İspaniyanın "Atletiko" klubunda çıxış edən Alvaro Moratadır.

Maraqlıdır ki, Son Hin Min ("Tottenhem", İngiltərə - 12 qol), Mauro İkardi ("Qalatasaray", Türkiyə - 12), Antuan Qrizmann ("Atletiko", İspaniya - 11), Duşan Vlahoviç ("Yuventus", İtaliya - 11), Olivye Jiru ("Milan", İtaliya - 10) kimi ulduz futbolçular Juninyodan geri qalırlar.

Cari mövsümün ən məhsuldar oyunçuları Almaniyanın "Bavariya" klubunun hücumçusu Harri Keyn və Kambocanın "Svay Rinq" klubunda çıxış edən Markus Haberdir. Hər iki forvardın hesabında 22 qol var. Onları 20 qolla Səudiyyə Ərəbistanının "Əl-Nəsr" komandasında oynayan Kriştianu Ronaldu izləyir.

Qeyd edək ki, Olavio Juninyo bu mövsüm bütün turnirlər daxil olmaqla "Qarabağ"ın heyətində 31 oyunda 16 qol vurub