Ölçüsü kiçik, qiyməti isə az qala mənzillərlə eynidir - VİDEO

Tarix: 29 Yanvar 2025 23:48

Ölçüsü kiçik, qiyməti isə az qala mənzillərlə eynidir.

Sonxeber.net Xəzər TV-yə istinadən bildirir ki, söhbət paytaxt ərazisində satışa çıxarılan qarajlardan gedir. Həm yaşayış binalarının altında, həm də kənar ərazilərdə yerləşən bu cür obyektlər sözün  əsl mənasında dəyərindən qat-qat baha qiymətlərlə alıcılara təklif edilir.

Məsələn, elan saytlarından birində 6 kvadratmetrlik saxlanc yerinin qiyməti 27 min manata olaraq qeyd olunub. Ən çox rast gəlinən isə 10-20 kvadratmetrlik  avtomobil yerlərinin qiyməti isə minimum 20 min manatdan başlayıb, 80-90 min manata qədər yüksəlir. Qiymətlərin bu qədər baha olmasının səbəbləri isə müxtəlif amillərlə əlaqələndirilir.

Ramil Osmanlı deyir ki, çoxmərtəbəli binalardan mənzil alan şəxslər yeraltı qaraj aldıqda çıxarış verilməsə də, müəyyən müqavilələr bağlayırlar ki, bunu da etibarlı hesab etmək olar. Ancaq həyətyanı  ərazilərdə yerləşən qarajlar üçün yüksək məbləğ ödəmək riskli ola bilər.

Onun sözlərinə görə, kənar ərazilərdə tikilən  qarajların yalnız nadir hallarda çıxarışı olur.  Əgər obyektin sənədləri tam qaydasındadırsa, o zaman qiyməti dəfələrlə yüksək olur. Çıxarışı olmayan qarajların isə plana düşərək sökülmə ehtimalı çoxdur. Bir sözlə, vətəndaşlar bu cür yerləri əldə etmək istədikdə diqqətli olmalı və hüquqi tərəfləri araşdırmalıdırlar.

Daha ətraflı videomaterialı təqdim edirik.