Gürcü klubu əsgər salamı verən Nicatın açıqlamasını yaydı

Tarix: 18 Iyul 2020 15:22

Gürcüstanın “Samtredia” klubunun rəsmi Feysbuk səhifəsi azərbaycanlı futbolçu Nicat Qurbanovun açıqlamasını yayıb.

N.Qurbanon dünən “Merani” ilə Premyer Liqa matçında (2:1) komandasının qələbə qolunun (penalti ilə) müəllifi olub. O, qoldan sonra bu günlərdə Tovuzda şəhid olan Azərbaycan hərbçilərinin xatirəsinə ehtiram olaraq əsgər salamı verib.

Qol.az-ın məlumatına görə, klubun Feysbuk səhifəsində N.Qurbanovu adından yayılan açıqlamada deyilir:

“Merani” ilə yaxşı oynadıq. Biz qələbə üçün hər şeyi etdik. Əgər növbəti oyunlarda da belə davam etsək, nəticə yaxşı olacaq.

O ki qaldı vurduğum qol zamanı etdiyim jestə, bu, müharibə zamanı həlak olan mənim bütün həmvətənlərimə həsr olunur. Hazırda onların ailəsi və yaxınları çətin durumdadır və bu addımımla onları dəstəkləmək istədim”.