Düşmənin kabusuna çevrilən xüsusi təyinatlı Cəlil Xeyrullayev - VİDEO

Tarix: 3 Yanvar 2021 09:50

Düşmənə sözün əsl mənasında qan uddurmağı bacaran xüsusi təyinatlılarımızdan bəhs edəcəyik indi. Sıralarından neçə-neçə igidimiz vətən uğrunda son damla qanına qədər döyüşərək, şəhidlik zirvəsinə ucaldı. Onlardan biri də Qubanın 2-ci Nügədi kənd sakini, 31 yaşlı Cəlil Xeyrullayev idi. Düşmənin xeyli canlı qüvvəsini məhv edən, Murovun, Cəbrayılın, Füzulinin və Hadrutun azad olunmasında xüsusi qəhrəmanlıq göstərən çavuşumuz.

Müharibədə ən çətin əməliyyatlara cəlb olunan və bütün döyüşlərdən üzüağ çıxan xüsusi təyinatlılarımızın sıralarında idi çavuş, 31 yaşlı şəhidimiz Cəlil Xeyrullayev..

Vətən müharibəsi başlayan ilk gündən döyüşlərə qatılan Cəlil Murovdağ zirvəsi, Cəbrayıl, Füzuli rayonlarının və Hadrut qəsəbəsinin düşməndən azad edilməsində fəal iştirak edib. Bu döyüşlər zamanı bir dəfə yaralansa da hospitala getməkdən imtina edərək, yoldaşlarını döyüş meydanında tək qoymayıb.Atası Mürvət Xeyrullayev deyir ki, övladım və bütün şəhidlərimiz 44 gün ərzində dastan yazdılar.

Xüsusi təyinatlımız şəhid olmazdan 2 gün əvvəl 10 nəfərlik komanda ilə düşmənin 60 yaxın xüsusi təyinatlı qüvvəsini məhv edib. Füzuli şəhəri uğrunda gedən döyüşlər zamanı yanında tank mərmisinin partlaması nəticəsində şəhidlik zirvəsinə ucalıb.

Xeyrullayevlər ailəsinin sonbeşiyi olan və hər zaman ailəsinin fəxri sayılan Cəlil indi bütün el-obanın qürur mənbəyidir.

Cəlil nişanlı idi. Toyunun bu ilin iyun ayında keçirilməsi nəzərdə tutulsa da, pandemiya səbəbindən təxirə salınmışdı. Şəhidimiz ölümündən sonra "Vətən uğrunda medalı" və "Cəbrayılın azad olunması uğrunda medalı" ilə təltif olunub.

Ətraflı Xəzərxəbərin süjetində: