Sabiq deputat şirkətinin adını dəyişdi

Tarix: 23 Fevral 2021 15:38

Azərbaycan Milli Məclisinin sabiq deputatı Qasımov Əsabil Qarakişi oğlunun rəhbərlik etdiyi (qanuni təmsilçi) "Azşuqar" Ticarət Şirkəti (VÖEN: 1400020391) adını və təşkilatı-hüquqi formasını dəyişərək "De Decco" MMC-yə çevrildiyini elan edib.

Sonxeber.net yeniavaz.com-a istinadən xəbər verir ki, "Azşuqar" Ticarət Şirkəti 08.04.1997-ci ildə dövlət qeydiyyatından keçib. Hüquqi ünvanı Nəsimi rayonu, Sahib Zeynalov, ev 22/23, m. 52-də yerləşir.

Məlumat üçün onu da bildirək ki, "Azərbaycan Respublikası Milli Məclisi deputatının etik davranış qaydaları haqqında" Azərbaycan Respublikasının Qanununun 5-ci maddəsinin 1-ci bəndinə görə deputat sahibkarlıq, kommersiya və digər ödənişli fəaliyyətlə (elmi, pedaqoji və yaradıcılıq fəaliyyəti istisna olmaqla) məşğul olmamalıdır.

Maraqlıdır ki, sabiq millət vəkili Əsabil Qasımovun Milli Məclisin rəsmi veb-səhifəsində - "meclis.gov.az"da yerləşdirilən tərcümeyi-halında açıq şəkildə qeyd olunub ki, millət vəkili 1995-ci ildən "Karat" holdinqinin direktorudur.

Qeyd edək ki, Əsabil Qasımov 1955-ci il noyabrın 8-də İmişli rayonunun Qaralar kəndində anadan olub. Ümumittifaq Yeyinti Sənayesi İnstitutunun Texnologiya fakültəsini bitirib. 1972-ci ildən İmişli çörək zavodunda texnoloq, 1977-ci ildən İmişli tədarük kontorunda tədarükçü, çörək zavodunda usta köməkçisi, baş mühəndis vəzifələrində çalışıb. Yeni Azərbaycan Partiyasının üzvüdür. Milli Məclisin İqtisadi siyasət komitəsinin üzvü olub.