Sarkisyan Koçaryana dəstək verməkdən imtina etdi

Tarix: 25 Mart 2021 15:18

Ermənistanın keçmiş hakim Respublika Partiyası iyunda keçiriləcək erkən seçkilərə hazırlaşmağa başlasa da, seçkilərdə hansı formatda iştirak edəcəyini hələ də müəyyənləşdirməyib.

Sonxeber.net "Qafqazinfo"ya istinadən xəbər verir ki, respublikaçılar Ermənistandakı siyasi proseslərdən kənar qalmamaq üçün partiyanın sədri Serj Sarkisyana təzyiq göstərirlər.

Xüsusən də, Ermənistanın keçmiş prezidenti Robert Koçaryanın hakimiyyət mübarizəsinə girdiyini nəzərə alsaq, partiya üçün əsas məsələ formatın müəyyənləşdirilməsidir.

Nəşr qeyd edib ki, respublikaçılar Koçaryanla vahid blok yaratmaq ehtimalını istisna edir. Baxmayaraq ki, bir çox RPA nümayəndəsi keçmiş prezidentə qarşı rəğbətini gizlətmir və  xüsusən də son parlament seçkilərindən sonra Sarkisyandan narazı olanlar Koçaryanın lehinə işləməyə hazırdır.

"Bununla yanaşı, partiyada seçki siyahısına kimin rəhbərlik edəcəyi məlum deyil. Belə ki, Serj Sarkisyanın siyasətdən ayrılmaq niyyətində olmadığını, ancaq eyni zamanda seçki siyahısında ilk nömrəyə iddia etmədiyini açıqlaması partiyanı çətin bir seçimlə qarşı-qarşıya qoyub: baş nazir postuna namizəd kim olmalıdır?",-deyə nəşr qeyd edib.

Nəşr ABŞ-da təhsil almağa gedən keçmiş müdafiə naziri Vigen Sarkisyanın seçkilərə qatıla bilməyəcəyini, Arpine Ohannisyanın partiya üzvlüyünü "dondurduğunu" və Koçaryanın seçki kampaniyasında yer alacağını qeyd edib. Partiyanın sədr müavini Armen Aşotyana isə partiyadaxili münasibətin mənfi olduğu bildirilir.

Bundan başqa, son iclasların birində Koçaryan növbədənkənar seçkilər zamanı məntəqələrə getməyin vacibliyini vurğulayıb, lakin Sarkisyan bunu rədd edib.

Həmçinin, Koçaryan küçə mübarizəsinin davam etməli olduğunu, Sarkisyan isə bunun təsirsiz olduğunu deyir.