Rusiyadan gələn təhdidlərə ciddi yanaşmaq lazımdır - Ekspert - VİDEO

Tarix: 30 Mart 2021 17:24

Rusiyadan gələn təhdidlərə ciddi yanaşılmalı və reaksiya verilməlidir. 

Sonxeber.net xəbər verir ki, bunu ARB24-ün "İşgüzar səhər" verilişinə açıqlamasında politoloq Anar Əliyev deyib. 

"Təəssüf ki, biz şovinist iddialarla çıxış edən, imperialist şüurundan geri çəkilmək istəməyən və bəzi hallarda isə rəqiblərinə qarşı açıq mübarizə apara bilməyəndə daha çox ətrafındakı dövlətlərə təzyiqlər və təhdidlər irəli sürən dövlətlə qonşuyuq. Qonşumuzu dəyişmək imkanımız olmasa da, onlardan gələn təhdidləri ciddi qəbul etməliyik. Düzdür, Qarabağın Rusiyaya birləşdirilməsi ilə bağlı praktik nəticələr özünü doğrulda bilməz. Amma bu təhdidlərin irəli sürülməsi Azərbaycana növbəti təzyiq variantlarıdır. Bu hallar ölkəmizin inkişafına, qarşılıqlı inteqrasiyadan və dərinləşəcək sülhdən formalaşacaq mühitə təhlükələr yaranmasını göstərir. Şoyqunun, eyni zamanda Rusiya Baş Qərargah rəisi Valeri Gerasimovun erməni həmkarı ilə son dövrlər intensivləşən əlaqə saxlaması, 10 noyabr bəyanatına tamamilə zidd fikirlərin səslənməsi, Qarabağın "qorunması" ilə bağlı Ermənistan ordusunun qarşısına hansısa vəzifələrin qoyulması və s. barədə qeyri-ciddi və təhlükəli fikirlərin səsləndirilməsi imkan verir ki, biz Rusiyadan gələn təhdidlərə ciddi yanaşaq və reaksiya verək", - o bildirib.