Samir Abasov: Onların qarşısında başıaşağı olmadıq

Tarix: 19 May 2021 23:24

"Hətta Əhməd Əhmədovu meydana buraxanda dedik ki, yüz faiz qol vuracaqsan və çempion olacağıq. Yolun əvvəlindəyik. Bu qələbə azarkeşlərimizin halalı olsun. Çoxdandır gözləyirdilər. Bizə dəstəklərini hər zaman hiss edirdik"

"Nə deyəcəyimi bilmirəm. Çox çətin oyun keçdi. Amma çox inanırdıq. Məşqlərdə də rahat idik". Sonxeber.net matc.az-a istinadən bildirir ki, bunu  "Neftçi"nin baş məşqçisi Samir Abasov "Qarabağ"ı 1:0 hesabı ilə məğlub etdikləri Azərbaycan Premyer Liqasının XXVIII tur matçından sonra "CBC Sport"a açıqlamasında çempionluq təəsüratlarını bölüşərkən deyib.

43 yaşlı mütəxəssis bildirib ki, qalib gələcəklərinə inanırdılar: "Hətta Əhməd Əhmədovu meydana buraxanda dedik ki, yüz faiz qol vuracaqsan və çempion olacağıq. Yolun əvvəlindəyik. Bu qələbə azarkeşlərimizin halalı olsun. Çoxdandır gözləyirdilər. Bizə dəstəklərini hər zaman hiss edirdik. Şükürlər olsun, onların qarşısında başıaşağı olmadıq. Bütün komandalarımıza avrokuboklarda uğurlar arzu edirəm".

Abasov komandanı qəbul edərkən çempionluq haqqında düşünmədiyini söyləyib: "Amma futbolçuları görəndən sonra yaxşı komanda quracağımıza inandım. Hər zaman bu oyunçuların daha yaxşısını edə biləcəyini bilirdim. Bu gün nəticəsini gördük. Çempion olduq. Futbolçu və baş məşqçi kimi çempionluq fərqli hisslərdir".