Aktual mövzular: Dollar alış-satışı, Neftin qiyməti, COP29, Hava proqnozu

Komandirinin nəşini çıxararkən şəhid oldu - VİDEO

Tarix: 11 Noyabr 2021 18:50

Dünən 44 günlük Vətən Müharibəsində Şuşa istiqamətində gedən döyüşlərdə 29 yaşında şəhadətə yüksələn Elgin Abbaslının anım günü idi. Ailəsi, yaxınları, döyüş yoldaşları Elginin Sumqayıtın Şəhidlər Xiyabanındakı məzarı başında ruhuna dualar oxuyub, onunla bağlı olan xatirələrindən söz açıblar.

Qeyd ediblər ki, Laçının Dəyhan kəndindən olan Abbaslı Elgin döyüşlər zamanı şücaət və qəhrəmanlıq göstərib. Onun hərbiyə marağı Uşaq yaşlarından olub. Hərbi xidmət müddəti bitdikdən sonra, 2014-cü ildən etibarən müddətdən artıq həqiqi hərbi xidmət qulluqçusu olub.

Elgin 2020-ci il, sentyabrın 27-də başlayan Vətən Müharibəsində Cəbrayılın, Füzulinin, Zəngilanın, Qubadlının və Laçının azad edilməsi uğrunda gedən döyüşlərdə iştirak edib, yaralıları döyüş meydanından çıxarıb.
Noyabr ayının əvvəllərindən başlayan Şuşa döyüşlərində də iştirak edən Elgin Abbaslının içində olduğu maşın 10 noyabr 2020-ci ildə Şuşa istiqamətində ermənilər tərəfindən atəşə tutulub. Qəhrəmanımız yaralanmağına baxmayaraq, geri çəkilməyib, şəhid olan komandirinin nəşini ərazidən çıxararkən özü də şəhidlik zirvəsinə ucalıb.

Whatsapp ilə göndər