''Anam atama deyirdi ki, uşaqlarla gülmə, danışma''

Tarix: 10 Yanvar 2022 18:10

"Bu gün, məni dünyaya gətirən insanın, anamın doğum günüdür! Ağlım kəsəndən onu çox sevdim. Hətta, hərdən mənə elə gəlirdi ki, dünyada ondan o yana heç kəsi onun qədər sevə bilmərəm. Sonralar, başqa insanları da sevdim. Ancaq hər məhəbbətin öz adı var idi, amma, heç birinin adı "Anam" deyildi".

Sonxeber.net axşam.az-a istinadən xəbər verir ki, bu sözləri Əməkdar artist Aybəniz Haşımova sosial şəbəkədə yazıb. Müğənni anası ilə bağlı etiraflar edib:  

"Anamın çox qəribə xasiyyəti var. O, heç vaxt övladlarını nə tumarlayıb, nə də öpüb. Çox kaprizlidir. Atama da deyərdi ki, uşaqlarla gülmə, danışma. Atam isə tam tərsinə, həmişə bizi əzizləyərdi. Niyəsə mənə elə gəlirdi ki, anam bizi hamıdan daha çox sevir. O, hiss həmişə ürəyimdə ən böyük yeri tutardı.

İllər ötdü, 13 yaşım təzəcə tamam idi ki, atam ağır xəstələndi. Sonra anamın və ailəmin ən böyük dəstəkçisinə çevrildim məcburən. Toylara gedib ailəmin qayğısına, atamın dərmanlarına kömək etməyə çalışdım və beləliklə, bütün xəyallarım uzun ömür yolunun ağır yük maşınına çevrildi. Yorulub heç bir dəfə də olsa, könlümdən keçirtmədim ki, axı niyə bu yükü daşıyıram?

Ailəmiz 8 uşaq, atam və anamdan ibarət idi. Ailəmizdə tək böyük bacım evli idi. Qalan hər kəs bacardığı kimi ailəyə kömək edirdi. Ən böyük yük mənim üzərimdə idi, bu gün də belədir. Atam artıq neçə ildir ki, dünyasını dəyişib. Anamın isə növbəti doğum günüdür. Sabah-sabah ona zəng edib, "sənə sağlam ömür, sağ əlin sol əlinə möhtac olmasın" arzusunu etdim. Anam isə cox sakitcəsinə "sağ ol Ayka, sağ ol" dedi. Çox qocalıb anam, çox ərköyün olub, nə edirsən heç nəyi bəyənmir, heç nədən razı qalmır. Görəsən, biz də belə olacağıg? Eybi yox, heç nəyi bəyənməsin, təki çox yaşasın".