Taksi sürücülərin vergi öhdəliyi

Tarix: 12 Iyun 2022 22:34

Vergi Məcəlləsinə əsasən, ölkə ərazisində fərdi nəqliyyat vasitəsi ilə taksi fəaliyyəti göstərən şəxslər sadələşdirilmiş vergiödəyiciləridir.

Sonxeber.net Dövlət Vergi Xidmətinə istinadla xəbər verir ki, həmin şəxslər fəaliyyət göstərdikləri hər ay üçün müvafiq qaydada fərqlənmə nişanı almalı, əldə etdikləri gəlirin məbləğindən asılı olmayaraq dövlət büdcəsinə sabit məbləğdə aylıq ödəniş etməlidirlər.

Məlumata əsasən, Vergi Məcəlləsinin 220.5-ci maddəsinin tələblərinə uyğun olaraq, taksi xidməti göstərənlər hər ay bir ədəd nəqliyyat vasitəsi üçün 9 manat məbləği əsasında müvafiq zona əmsalları tətbiq edilməklə hesablanmış vergi məbləğini büdcəyə ödəməlidirlər. Həmin əmsallar aşağıdakı qayda üzrə müəyyən edilib:

-Bakı şəhərində (kənd və qəsəbələr daxil olmaqla) və Bakı şəhəri ilə ölkənin digər yaşayış məntəqələri arasında - 2 əmsal;

-Abşeron rayonu, Sumqayıt, Gəncə şəhərlərində və həmin rayon və şəhərlərlə digər yaşayış məntəqələri arasında (Bakı şəhəri (kənd və qəsəbələr daxil olmaqla) istisna olmaqla) - 1,5 əmsal;

-Digər şəhər və rayonlarda və həmin şəhər və rayonlarla digər yaşayış məntəqələri arasında (Bakı şəhərinin kənd və qəsəbələri daxil olmaqla), Abşeron rayonu, Sumqayıt, Gəncə şəhərləri istisna olmaqla) - 1 əmsal.

"Sosial sığorta haqqında" Qanunun 14.5.1-1.10-cu maddəsinə əsasən fərqlənmə nişanı almış vergiödəyiciləri hər ay üçün minimum əməkhaqqının 6 faizi məbləğinin müvafiq zona əmsalları tətbiq edilməklə hesablanmış sosial sığorta məbləğini büdcəyə ödəməlidirlər.

Bu əmsallar aşağıdakı qaydada müəyyən edilib:

-Bakı şəhərində (kənd və qəsəbələr daxil olmaqla) - 2 əmsal;

-Abşeron rayonunda, Sumqayıt və Gəncə şəhərlərində - 1,5 əmsal;

-Digər şəhər və rayonlarda - 1 əmsal.

"İcbari tibbi sığorta haqqında" Qanunun 15-10.1.3-cü maddəsinə əsasən, fərqlənmə nişanı əldə edərək fəaliyyət göstərən

vergiödəyiciləri hər ay üçün minimum əməkhaqqı məbləğinin 4 faizi miqdarında icbari tibbi sığorta haqqı ödəyirlər.

Qeyd olunub ki, "Fərqlənmə nişanı" olmadan avtomobil nəqliyyatı vasitələri ilə sərnişin və ya yük daşınmasına görə 40 manat məbləğində maliyyə sanksiyası tətbiq edilir.