''Aktyorun soyuducusu dolu deyilsə, ortaya yaxşı iş qoya bilməz'' - Məcid Hüseynov

Tarix: 6 May 2020 18:05

"Karantini bağda ailəmlə bir yerdə keçirirəm".

Sonxeber.net xəbər verir ki, bunu aktyor Məcid Hüseynov "Ölkə.az"ın əməkdaşı ilə söhbətində bildirib.

"Bildiyiniz kimi, müasir zəmanənin insanlarının ən böyük problemi işlərin çoxluğundan, ailəyə və digər sevdİyi işlərə vaxt ayıra bilməməsidir. Bu dönəmdə bir az sevdiyim işlərə vaxt ayırmaq imkanım oldu. Ümumiyyətlə, mənim fikrimcə, insan hər bir çətin vəziyyətin yaxşı tərəflərini tapmalıdır. Həyatı özü üçün maraqlı etmək insanın öz əlindədir",- deyə, o, bildirib. 

M. Hüseynov bu dönəmdə özündə yeni istedad kəşf etdiyini də bildirib. 

"Boş vaxtımdan istifadə edib, bir az zərgərliklə məşğul oldum. Bu sahəyə həvəsim böyükdür, düşündüm ki, boş vaxtımdan istifadə edib bir az özümü inkişaf etdirim. Düzdür, hələlik öz əl işim yoxdur, amma inanıram ki, tezliklə ortaya bir iş qoyaram".

O, tezliklə televiziyada aparıcı kimi görünəcəyini, bununla bağlı yeni layihə üzərində çalışdığını da qeyd edib. 

"İnşallah, tezliklə ekranlara aparıcı kimi geri dönmək istəyirəm. Bunun üçün yeni layihə üzərində çalışırıq. İnşallah, ölkəmizdə hər şey yoluna düşdükdən sonra, mən də öz növbəmdə yeni işlərimlə tamaşaçıları sevindirəcəyəm".

Gənc aktyor son zamanlar film, seriallara yazılan ssenarilərin ürəyincə olmadığını da açıqlayıb.

"Hazırda yazılan ssenarilərin demək olar ki, 70 faizi məni qane etmir. Bunun da səbəbi maddiyyatın altında yatır. Çəkilişlərə çox az pul ayrılır. Bu da istər- istəməz ortaya qoyulan işin keyfiyyətini aşağı salır".

Əməkdaşımızın "Bəzi həmkarlarınız ad almadıqlarından, bəziləri evi olmadığına görə bəzən haqlı, bəzən də haqsız şikayətlənirlər. Siz nədən narazısınız?" sualına aktyor sərt şəkildə reaksiya verib. 

"Məncə, həmkarlarım bu mövzuda şikayətlənməsə, daha yaxşı olar. Hər şeyin öz vaxtı var, başınızı salın aşağı, işinizi görün. Kimsə ad ala bilmirsə, evi yoxdursa, səbəbi əvvəl özündə axtarmalıdır. Bəlkə, çalışdığın teatrda sənin kiminləsə şəxsi problemin var, buna görə də kimsə sənə mərdimazarlıq edir, ya da bəlkə müdir özü sənin adını təqdimata salmır? Problemi özündə görməyənlər, oturub onun- bunun dalınca danışır, şikayətlənir. Belə olmaz, axı. Əgər sən, həqiqətən də o ada layiqsənsə, əvvəl-axır o sənin qismətin olacaq ",- deyə, o, vurğulayıb.

"Bu vaxta qədər, heç kəsdən heç nə gözləməmişəm. Hər zaman özümə arxayın olub, addım atmışam, əziyyət çəkmişəm. Səhv addım atanda da öz yanlışım olub, doğru olanda da öz uğurum olub. Hər zaman  elə hərəkət etmişəm ki, xalqın qınağına səbəb olmayım. Şükür Allaha ki, söyülən aktyor deyiləm. Bu, məni çox sevindirir. İnsanların sevgisini hər zaman hiss etmişəm. Küçədə görəndə də, məclislərdə də mənə qarşı münasibət hər zaman yaxşı olub, yaxınlaşıblar, salamlaşıb hal-əhval tutublar, sağ olsunlar". 

Bu sözləri Hüseynov ona qarşı olan tamaşaçı sevgisindən danışarkən bildirib. 

Söhbət əsnasında gənc aktyor bir çox maraqlı məqamlara da toxunub.

"Bizim sahə elə bir peşədir ki, yaxşı, keyfiyyətli iş görmək üçün mütləq şəkildə maddi imkan lazımdır. Burada söhbət istedadlı insanlardan gedir. Aktyorun maddi imkanı yaxşı olsa, soyuducusu dolu olsa, beynində onu narahat edən düşüncələr olmasa, inandırım sizi, o da işini çox yaxşı görəcək. Yoxsa, aktyor gəlib çəkiliş meydançasında rejissora deyirsə məni birinci çək, toyum var, orada hansı keyfiyyətdən danışmaq olar? Aktyorun məvacibi aşağı olduğu üçün məcburdur ki, ehtiyaclarını qarşılamaqdan ötrü başqa işlərlə məşğul olsun".