“Çempionatın bərpasına görə risklərin olduğunu başa düşməliyik” – Elxan Məmmədov
Tarix: 1 Iyun 2020 10:30
"Artıq mart ayında Avropa çempionatının 2020-ci ildə baş tutmayacağı
bəlli oldu. Hazırlıq plana uyğun gedirdi və üç mərhələdən ibarət idi. Birinci
planlaşdırma mərhələsidir. İkinci mərhələ planların həyata keçirilməsi, üçüncü
isə Avro-2020-nin başlanğıcıdır".
Qol.az xəbər verir ki, bu
sözləri AFFA-nın icraçı vitse-prezidenti Elxan Məmmədov "Matç TV"yə
açıqlamasında deyib.
Avro-2020-yə hazırlıq barədə danışan federasiya
rəsmisi birinci mərhələni bitirdikdən sonra dünyada yayılan koronavirus
pandemiyasına görə işlərin dayandırıldığını bildirib: "Bizim güclü
tərəflərimizdən biri stadionun hazır olması idi. Əlavə sərmayəyə ehtiyac yoxdur
və hər şey plan üzrə getdi. 2021-ci ilin iyununda stadionda böyük tədbirlər
planlaşdırılmadı. Tədbirlərimizin çoxunu daxili qurğularda keçirdik. Məqsəd bu
gözəl ot örtüyünü qorumaqdır".
Elxan Məmmədov Azərbaycan Premyer
Liqasının bərpası barədə də danışıb: “Klubların testdən keçirilməsi
təklifi AFFA-dan gəldi. Bütün klublar razılaşdı və müvafiq testləri həyata
keçirdilər. Bu, hazırlıq mərhələsidir. Çempionatın bərpa olunmasına gəlincə, ilk
növbədə, klubların məşqə başlamaları lazımdır. Bundan 3-4 həftə sonra isə
çempionat bərpa olunmalıdır. Ancaq müəyyən risklərin olduğunu başa düşməliyik.
Bu səbəbdən, Nazirlər Kabineti yanında Operativ Qərargahın tövsiyələrini
dinləyir və yerinə yetiririk. Çünki hər hansı neqativ nəticənin olmasını
istəmirik. Təkcə AFFA yox, bütün strukturlar, fəaliyyət sahələri tövsiyələrə
qulaq asmalı və sonra müvafiq qərarlar qəbul etməlidir".