Bakıda mənzillərin qiyməti daha da BAHALAŞACAQ

Tarix: 29 Yanvar 2021 15:12

"İşğaldan azad edilən ərazilərdə infrastruktur və şəhərsalma, tikinti layihələri Azərbaycan iqtisadiyyatına müsbət mənada çox böyük töhfə verəcək".

Bunu Sonxeber.net-a açıqlamasında əmlak məsələləri üzrə ekspert Ramil Osmanlı deyib.

Ekspert bildirib ki, qısa müddətdə böyük məbləğdə investisiyanın işğaldan azad edilən ərazilərə yatırılması Azərbaycanda iqtisadiyyatın bütün istiqamətlərini inkişaf etdirəcək:

"Nəzərə almalıyıq ki, Azərbaycan höküməti bu proqrama çox böyük məbləğdə vəsait ayırmağı planlaşdırır. Təbii ki, bura xarici investorlardan daxil olan vəsaitlərlə yanaşı dövlət büdcəsində nəzərdə tutulan xərclər daxildir. Eyni zamanda, bu proses Azərbaycanın daxilində digər bəzi fondlardan daxilolmaların artımı ilə nəticələnəcək. Bu qısa müddətdə böyük məbləğdə vəsaitin, investisiyanın həmin bölgəyə artımı təkcə bölgənin inkişafı üçün deyil, Azərbaycanda iqtisadiyyatın bütün istiqamətlərdə inkişafı üçün bir zəmin, bir şərait yaradacaq. Və eyni zamanda təbii ki, qısamüddətli dövrdə bazara pul axınlarının artımı, infrastruktur layihələri, şəhərsalma tədbirləri məşğulluq səviyyəsini artırmaqla yanaşı infilyasiyanın baş verməsi, ayrı-ayrı istehlak bazarlarında qiymət artımlarının baş verməsi kimi prosesləri də özündə ehtiva edir. Təbii ki, bu da qaçılmaz olacaq. Bununla da, həmin vəsaitlər daşınmaz əmlak bazarına daxil olacaq, yönəldiləcək və daşınmaz əmlak bazarında aktivliyi artıracaq. Aktivliyin, dinamikanın artımı isə təbii ki, qiymət artımı ilə nəticələnə bilər. Bu, təkcə regionda deyil, eyni zamanda respublikanın digər ərzilərində, o cümlədən paytaxtda qiymət artımına gətirib çıxara biləcək amil kimi səciyyələndirilir. Məşğulluq səviyyəsinin, daxili məhsulun artımı daşınmaz əmlak bazarında qiymət artımını şərtləndirən əsas amillərdən biridir".

R.Osmanlı deyib ki, işğaldan azad edilən ərazilərin əksəriyyətində daşınmaz əmlak çox baha qiymətə təklif ediləcək:

"Bu günlərdə ölkə başçısının özü tərəfindən də belə bir fikir səsləndirildi ki, "smart-city" (Ağıllı şəhər"), "smart-village" ("Ağıllı kənd") layihələrinin icrası ilə bağlı məsələlər nəzərdən keçirilir. Sözsüz ki, işğaldan azad olunan ərazilərin böyük hissəsi turizm potensialı baxımından olduqca əlverişli ərazilərdir. Eyni zamanda bir sıra istiqamətlərdə magistral dəmiryolu və avtomobil xətlərinin çəkilməsi planlaşdırılır ki, bu da həmin magistral xətlərin üzərində yerləşən kəndlər, şəhərlər var. Bu baxımdan hesab edirəm ki, həmin ərazilərdə bazara çıxarıla biləcək kifayət qədər qiymətli daşınmaz əmlak mövcuddur. Məsələn, Şuşa şəhərinin özü, Kəlbəcər, Laçın, Qubadlı, bunlar turistik baxımdan əlverişli ərazilərdir, o cümlədən Tərtər rayonunun Kəlbəcər istiqamətində uzanan hissəsi, Xocavəndin Hadrut, Tuğ kimi qəsəbələri və s. Eyni zamanda Zəngilan ərazisində Mincivan və digər ərazilərdə planlaşdırılan stansiyalar və başqa belə ərazilərdə qiymətin yüksək olacağı qaçılmazdır. İndidən deyə bilərəm ki, bu ərazilər kifayət qədər baha qiymətə təklif olunacaq daşınmaz əmlak subyektlərinin özündə birləşməsini ehtiva edir".

Təhməz Əsədov