Çində avtomobil satışları 11,6 faiz azalıb

Tarix: 10 Fevral 2021 22:20

Dünyanın ən böyük avtomobil bazarı olan Çində yanvarda avtomobil satışları əvvəlki ayla müqayisədə 11,6 faiz azalıb.

Sonxeber.net bildirir ki, AZƏRTAC Çin Avtomobil İstehsalçıları Assosisasiyasına istinadla xəbər verir ki, azalmada əsas pay yerli istehsal avtomobillərə düşüb. Yerli istehsalın azalmasına səbəb isə çip çatışmazlığı olub.

Məlumdur ki, 18 il ardıcıl artımdan sonra dünyanın ən böyük avtomobil bazarı olan Çində son 3 ildə satışlarda azalma tempi müşahidə olunur. Əgər 2018-ci və 2019-cu ildə qeydə alınan azalmalar sırf alıcı tələbatı ilə bağlı idisə, ötən ilki azalma COVID-19 pandemiyasının təsiri ilə əlaqədar olub. Keçən ilin aprelindən sonra pandemiyanın mənfi təsirlərinin azalması fonunda iqtisadiyyatın bərpası avtomobil bazarının canlanmasına səbəb olub. Cari ilin yanvarında Çində avtomobil satışı ötən ilin eyni dövrü ilə müqayisədə 29,5 faiz artıb. Mütəxəssislər bu tempin davam edəcəyi halda Çinin avtomobil bazarında illik artım tempinin bərpa olunacağını güman edirlər.