Şimali Kiprdə iri mafiozun qətli: izlər Söyləməz qardaşlarına aparır

Tarix: 10 Fevral 2022 21:22

Şimali Kiprdə iri (həm də sözün hərfi mənasında) mafioz və iş adamı Halil Falyalının və sürücüsünün qətlinə görə "Söyləməz qardaşları" adlı mafiyanın lideri Mustafa Söyləməz də daxil olmaqla üç şübhəli saxlanılıb. Bu haqda Türkiyə KİV-ləri xəbər verir.

Qumarxanalar və otel biznesi ilə məşğul olan Halil Falyalı bir neçə gün əvvəl Şimali Kiprin Girne şəhərində avtomobillə hərəkətdə olarkən silahlı hücuma məruz qalıb. Killerlər guya avtomobillərinin xarab olduğu görüntüsü yaradaraq onun yolunun üstündə dayanıb gözləyiblər, Falyalının avtomobili yaxınlaşanda onu güllə yağışına tutublar. Aldığı yaralardan Falyalının sürücüsü hadisə yerində, özü xəstəxanada ölüb.

Onun öldürülməsində "Söyləməz qardaşları" adlı mafioz qruplaşmanın əli olduğuna dair şübhələr çox keçmədən yaranıb. Və üç şübhəli İstanbulda saxlanılıb, onlardan birinin-Mustafa Söyləməzin Halil Falyalı ilə müntəzəm telefon əlaqəsinin olduğu bildirilir.

"Söyləməz qardaşları" mütəşəkkil cinayətkar qruplaşmasının adı Türkiyədə bir çox cinayətlərdə çəkilir. Bu qruplaşmanın iki üzvü-Mehmet Sena Söyləməz və Mehmet Faysal Söyləməz 2004-cü ildə Türkiyə hüquq-mühafizə orqanları tərəfindən İnterpol xətti ilə beynəlxalq axtarışa verilib. 2010-cu ilin əvvəllərində onlar Bakıda tutulub və daha sonra Türkiyəyə ekstradisiya edilib.

Hərçənd indi Mustafa Söyləməzin saxlanılması ilə bağlı xəbərlərdə Türkiyə KİV-ləri həmin şəxslərin ötən ilin iyununda Azərbaycanda saxlanıldığını və Türkiyəyə ekstradisiya olunduğunu qeyd edirlər. Lakin Azərbaycan mənbələrində bu barədə hər hansı məlumat yoxdur.

Milli.Az