Afət Maqsud Mahmudovun məhkəməsində - Yatanda telefonuma zəng gəldi, kişi dedi ki...

Tarix: 5 Mart 2022 12:55

Ukraynada tutularaq Azərbaycana gətirilən iş adamı Maqsud Mahmudovun barəsindəki cinayət işi üzrə məhkəmə prosesi davam etdirilib.

Sonxeber.net-ın APA-ya istinadla xəbərinə görə, Bakı Ağır Cinayətlər Məhkəməsində hakim Faiq Qəniyevin sədrlik etdiyi prosesdə müğənni Afət Həsənova (Fərmanqızı) ifadə verib.

Zərərçəkmiş müğənni bildirib ki, Maqsud Mahmudov ondan 1000 dollar istəyib: "Məndən tələb etdiyi məbləği vermədim. Bundan sonra dedi ki, onda hazırlaş, axşam müharibə başlayacaq. Həmin axşamdan başladı, özü ağılda biri də alçaldıcı ifadələrlə başladı. Yatdığım anda telefonuna zəng gəldi. Bir kişi dedi ki, Gəncədə toyumuzu oxumusuz. Yenə də istəyirik sizi dəvət edək.

Maqsud sonra dedi ki, sən kimsən ki, bahalı maşın sürürsən? Dedim xalq alıb verib. Elşad adlı şəxs dedi ki, canlı yayımdasız. Deyəndə "canlıdasan" dəstəyi asmadım. Sosial problemlərdən danışdı. Dedim hər yerdə var. Bu vaxt "Paşa, qoşul bura" dedi. Demişdi ki, o, gürcüstanlıdı. Əllərim əsirdi. Vicdanı olan məni başa düşər. Xəncər yarası sağalır, söz yarası sağalmır".

Müğənni məhkəmədə təqsirləndirilən şəxsə ən ağır cəza verilməsini istəyib.

Zərərçəkmiş şəxsin ifadəsinə münasibət bildirən Maqsud Mahmudov isə deyilənlərin yalan olduğunu bildirib:

"Afətin danışdıqlar yalandır. Tanımıram, tanımaq da istəmirəm. Bloger Qabil Məmmədov dedi ki, Afət deyib ki, bizi ermənilər maliyələşdirir. Dedim məni tanımır? Kimdir ki, mən ondan pul istəyim? Vasifə dedim ki, bunları yıxıb sürüyəcəm. Dedi 1 saat vaxt ver, silinəcək. Bütün hamısını silindi. Dedi ki, videoalar atacam. Mən Vasifin də Manafın da yanında söydüm. Yalan deyir mən ondan pul istəməmişəm. Mən canlı yayımda da dedim ki, nə vaxt pul vermisən? Harda hədə-qorxu gəlmişəm? Artistdilər də".

Proses davam etdiriləcək.

Qeyd edək ki, M. Mahmudova Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə) , 182.2.2 ( (təkrar hədə-qorxu ilə tələb etmə) və 183.2.2 (xüsusi dəyəri olan əşyaları talama - təkrar törədildikdə) maddələri ilə ittiham elan olunub. Daxili İşlər Nazirliyi tərəfindən beynəlxalq axtarışa verilmiş Mahmudov Maqsud Soltan oğlu ötən ilin iyul ayında Ukrayna ərazisində tutulub. O, sentyabrın 18-də Ukraynadan Azərbaycana gətirilərək istintaqa təhvil verilib.

İş üzrə 91 nəfər zərərçəkmiş tanınıb.