Səudiyyə Ərəbistanı ilə aparılan silah sövdələşmələri Türkiyəyə siyasi güc qazandıracaq - Türkiyəli ekspert

Tarix: 11 Avqust 2023 14:20

Türkiyə müdafiə şirkətləri ilə Səudiyyə Ərəbistanı arasında aparılan silah sövdələşmələri nəticəsində Türkiyə həm siyasi güc qazanacaq, həm də bölgəyə sülh və əmin-amanlıq gələcək.

Sonxeber.net-ın TurkicWorld-ə istinadən məlumatına görə, bunu Türkiyənin təhlükəsizlik üzrə eksperti Dr. Eray Güçlüer deyib.

"Siyasi gücümüz gündən-günə artdıqca bölgəyə sülh gələcək. Səudiyyə Ərəbistanı ilə "Baykar" arasında müqavilə bir neçə milyard dollardan çoxdur. Qətər və BƏƏ ilə razılaşmalar da bunlara yaxındır. Bu tip razılaşmalar Türkiyəyə də müxtəlif aspektlərdən töhfə verir. Silahı təmin edirik.

Əslində, bu o deməkdir ki, biz təhlükəsizliyi təmin edirik. Müqavilələrdə növbəti addım "Altay" tankı olacaq. "Altay" tankı ilə bağlı danışıqlar aparılır. Səudiyyəlilər "Altay" tankının səhra şəraitində modifikasiya edilməsini istəyirdilər. Digər səhra olan ölkələrdə də bu tanka tələbat var", - deyə ekspert bildirib.

Dr. Eray Güçlüer qeyd edib ki, Türkiyə Səudiyyə Ərəbistanı, İran və digər Körfəz ölkələri ilə güclü iqtisadi əlaqələrə əsaslanan siyasi əlaqələr qurarsa, bölgədəki üstünlüyü və təsiri artar. Sülh və əmin-amanlıq mövzusunda Türkiyənin hər zaman humanitar perspektivi olub.

Qeyd edək ki, 18 iyul tarixində Türkiyənin "Baykar" şirkətinin baş direktoru Haluk Bayraktar ilə Səudiyyə Ərəbistanı müdafiə nazirinin müavini Halid Bin Hüseyn Əl Bayari arasında "Bayraktar AKINCI" TİHA-Pilotsuz Döyüş Aparatının (Taarruzi İnsansız Hava Aracı) Səudiyyə Ərəbistanına ixracı ilə bağlı müqavilə imzalanıb.

Bundan əlavə, 8 avqust tarixində "Baykar" və SAMI (Saudi Arabia Military Industries) şirkətləri Səudiyyə Ərəbistanında pilotsuz uçuş aparatlarının yerli istehsalı üçün, ASELSAN ilə NCMS şirkəti arasında elektro-optik sistem və təlim texnologiyaları, ROKETSAN və NCMS şirkətləri arasında ağıllı döyüş sursatları və təlim texnologiyaları ilə bağlı anlaşma memorandumu imzalanıb.