QHT sədri: “Azərbaycan gəncləri fəal seçicilərdir”

Tarix: 24 Yanvar 2024 09:42

"Azərbaycan gəncləri fevralın 7-nə təyin olunmuş növbədənkənar prezident seçkilərinin səsvermə gününü səbirsizliklə gözləyir".

Sonxeber.net xəbər verir ki, bunu secki-2024.az saytına açıqlamasında Gənclərin Təşəbbüsünə və İnkişafına Dəstək İctimai Birliyinin sədri Toğrul Allahverdili deyib.

O əminliklə bildirib ki, gənclərimiz öz gələcəyinə səs verərək taleyüklü missiyalarını həyata keçirəcəklər: "Bu gün Azərbaycan gənclərinin inkişafı ilə bağlı dövlətimiz tərəfindən hər cür şərait yaradılıb. Hər bir cəmiyyətdə sağlam düşüncə və təfəkkürə malik olan gənclərə çox böyük ehtiyac var. Buna görə də milli ruhda gənclərin yetişdirilməsi zəruridir. Azərbaycan dövləti uzun illərdən bəri gənclərin bu ruhda yetişdirilməsi üçün praktiki işlərə başlayıb. Məhz bunun bəhrəsini də xalq olaraq zaman-zaman görmüşük. Üç il əvvəl uzun illər işğal altında qalan torpaqlarımızı azad etmək üçün düşmən gülləsinin qarşısında sipər olan Azərbaycan gənci bu gün daha da inkişaf edib".

QHT sədri söyləyib ki, cəmiyyətin təkanverici qüvvəsi olan gənclərin fəal seçici rolunda çıxış etməsi cəmiyyətin digər təbəqələrinə də nümunədir: "Düşünürəm ki, səsvermə hüququ olan hər bir gəncin bu istiqamətdə atdığı məsuliyyətli addım onların ölkə vətəndaşı olaraq əsas vəzifələrindəndir. Ölkə gənclərinin seçkilərdə fəal iştirak etməyə hazır olduğu müşahidə olunur və bu da seçki ab-havasını canlandırır".

T.Allahverdili vurğulayıb ki, hazırda Azərbaycan seçicilərinin sıralarına səsvermə hüququ yaranan xeyli sayda gənc qoşulub.

Onun sözlərinə görə, məhz buna görə də budəfəki seçkilər 2024-cü ildə səsvermə hüququ yaranan gənc seçicilərimiz üçün əlamətdar bir hadisədir: "Onlar Azərbaycan tarixində bir ilkə həm imza atacaqlar, həm də şahidlik edəcəklər. Çünki müstəqil Azərbaycan tarixində ilk dəfədir ki, prezident seçkiləri ölkənin bütün suveren ərazisində keçirilir".