Azərbaycanlı həkimlər Almaniyada: almanlar nə deyir?

Tarix: 6 Sentyabr 2024 23:12

Almaniyanın Köln şəhərindəki "Bheinsche Anzeigenblatter" qəzetində azərbaycanlı həkimlər barədə məqalə dərc olunub.

Sonxeber.net "Almaniyadakı azərbaycanlı həkimlərin forumu" (Forum der Aserbaidschanischen Ärzte in Deutschland) məqaləsini təqdim edir:

"14 sentyabr tarixində Bonn şəhərində yerləşən "Kameha Grand" otelində Almaniyada fəaliyyət göstərən azərbaycanlı həkimlər və tibb tələbələri üçün peşəkar mübadilə və əlaqələrin qurulması üçün unikal platforma təşkil olunacaq. Tədbirdə müxtəlif tibb sahələrindən 200 tanınmış mütəxəssisin iştirak edəcəyi və müasir tibb və səhiyyə ilə bağlı aktual mövzular üzrə müzakirələr aparılacağı gözlənilir.

Xüsusilə vurğulanmalı məqam bir çox azərbaycanlı həkimin Almaniyanın səhiyyə sisteminə olan minnətdarlığıdır. Onların əksəriyyəti 10-15 il əvvəl qonaq həkim, assistent həkim və ya tibb tələbəsi kimi Almaniyaya gəlib və alman tibb təhsilinin mükəmməlliyi sayəsində böyük karyera nailiyyətləri əldə ediblər. Bu gün həmin həkimlər öz sahələrində mühüm vəzifələrdə çalışan baş həkimlər və şöbə müdirləridir.

Forum ötən il "Troisdorf GFO" klinikasında radiologiya, neyroradiologiya və nüvə təbabəti şöbələrinin baş həkimi və Almaniyadakı Azərbaycanlılar Alyansının sədri Priv.-Doz. Dr. Nuran Abdullayevin təşəbbüsü ilə yaradılıb. Hazırda forumun idarə heyətinə Elvin Hüseynov rəhbərlik edir. Tədbirdə Azərbaycan hökumətinin nümayəndələri, o cümlədən Diasporla İş üzrə Dövlət Komitəsinin sədri Fuad Muradovun da iştirak edəcəyi gözlənilir.

Forumun məqsədi mövcud əlaqələri gücləndirmək və gələcək əməkdaşlıqlar üçün yeni yollar açmaqdır. Bu, azərbaycanlı həkimlərin Almaniya səhiyyə sisteminə verdikləri töhfələri dəyərləndirmək və onların bu sistemə uğurlu inteqrasiyasını qeyd etmək üçün unikal bir fürsət olacaq.

İlk forum Köln şəhərindəki Flora mərkəzində, ikinci forum isə Berlində keçirilib. Üçüncü forum isə bu dəfə Bonn şəhərində baş tutacaq".