Türkiyə turist sayına görə rekord qırdı

Tarix: 1 Fevral 2025 16:44

2024-cü ildə 62,2 milyon turist qəbul edərək 61,1 milyard dollar gəlir əldə edən Türkiyə turizmdə öz rekordlarını qırıb.

Sonxeber.net xəbər verir ki, Türkiyə 2024-cü ildə ziyarətçi sayında illik 9,8% artım əldə edərək 62.269.890 turistə ev sahibliyi edib. Bu rəqəm, pandemiyadan əvvəlki il olan 2019-cu illə müqayisədə 20,3%-lik artımı ifadə edir. Bununla da Türkiyə 2024-cü ilin əvvəlində elan etdiyi 60 milyon və ötən oktyabrda yenilədiyi 61 milyon turist hədəflərini də geridə qoyub .

Bundan əlavə, Türkiyə turizmdən 61,1 milyard ABŞ dolları gəlir əldə edərək ötən illə müqayisədə 8,3% daha çox gəlir qazandı. Ümumilikdə, 2024- cü il Türkiyənin turizm sahəsində ən uğurlu ili olub.

Avropa, Yaxın Şərq və Mərkəzi Asiya Türkiyənin əsas turizm bazarları olaraq qalsa da, Amerika, Hindistan və Çin kimi inkişaf edən bazarlarda 2024-cü ildə nəzərəçarpacaq artım qeydə alınıb. Rusiya, Almaniya və Böyük Britaniya ən çox turist göndərən üç ölkə sırasındadır. Digər tərəfdən, inkişaf edən bazarlardan gələn turistlərin sayında ABŞ üzrə 8,1%, Çin üzrə 65,1% və Hindistan üzrə 20,7% artım müşahidə olunub.

Türkiyəyə gələn beynəlxalq turistlər ölkədə orta hesabla 10,7 gün keçirib və bir  turistdən əldə edilən gəlir 972 ABŞ dolları təşkil edib. Birləşmiş Millətlər Təşkilatının Turizm qurumuna (UN Tourism) görə, Türkiyə 2023-cü ildə dünyanın ən çox ziyarət edilən ilk beş turizm məkanı arasında yer alıb./Qaynarinfo