Dünyada və Azərbaycanda ən çox bazar payı olan mobil cihaz istehsalçılarının adları açıqlandı

Tarix: 9 Iyul 2020 20:48

Mobil cihaz istehsalçılarının qlobal miqyasda bazar payı açıqlandı.

Sonxeber.net ted.az-a istinadən bildirir ki, bu haqda Global Stats analitik şirkəti məlumat yayıb.

Məlumata görə, iyun ayı ərzində Cənubi Koreyaya məxsus Samsung şirkətinin dünya üzrə bazar payı 31.06% olub. İkinci ən çox bazar ABŞ-ın Apple kompaniyasına məxsusdur. Ötən ay ərzində sözügedən şirkətin bazar payı 25.26%-ə çatıb. Daha sonra siyahıda 10.69%-lə Huawei, 8.55%-lə Xiaomi, 4.65%-lə Oppo gəlir.

Qeyd edək ki, Samsung şirkəti Azərbaycan üzrə bazar payı olan telefon istehsalçıları arasında da liderdir. İyun ayında bu kompaniyanın ölkə üzrə bazar payı 50.63% olub. Onun ardınca isə son zamanlar məhsulları ilə yerli istifadəçilər arasında məşhurlaşan Xiaomi gəlir, 25.38%. Üçüncü yerdə qərarlaşan Apple 12.29% paya sahibdir. Huawei şirkətinin bazar payı isə 4.73% olaraq qeydə alınıb.